बिरदवडी परिसरातील क्रॅश बॅरियरची चोरी

आंबेठाण, ता. ९ : बिरदवडी परिसरात प्रवाशांच्या सुरक्षेसाठी रस्त्याच्या कडेला लावण्यात आलेले क्रॅश बॅरियर अज्ञातांकडून चोरी करण्याचा प्रयत्न केला. धोकादायक ठिकाणी अपघात होऊ नये, यासाठी हे क्रॅश बॅरियर उभारले आहेत. पण ते विकले की पैसे मिळतात, या उद्देशाने क्रॅश बॅरियर रात्रीच्या वेळी चोरी करण्याचा प्रयत्न केला जात आहे. त्यामुळे अपघाताची शक्यता वाढत असून तत्काळ, अशी चोरी करणारांवर कारवाई करावी, अशी मागणी होत आहे.

चाकण एमआयडीसी भागात विविध रस्त्याचे रुंदीकरण व नूतनीकरण करण्यात आले आहे. यात म्हाळुंगे इंगळे ते बिरदवडी मार्गे भाम फाटा या रस्त्याच्या ‘पीएमआरडीए’कडून डांबरीकरण केले आहे. याशिवाय चाकण ते भांबोली फाटा आणि वासुली फाटा ते करंजविहिरे हा रस्ता हायब्रीड ऑन्युटी या योजनेतून सिमेंट काँक्रिटीकरण करण्यात आला. याशिवाय एमआयडीसी भागात अनेक रस्ते नवीन केले आहेत. नव्याने झालेल्या या मार्गावर अपघात होऊ नये यासाठी क्रॅश बॅरियर उभारण्यात आले आहेत. परंतु, सध्या या मार्गावर उभे केलेल्या लोखंडी क्रॅश बॅरियरचे नट-बोल्ट खोलून ते चोरी केले जात आहेत. रात्रीच्या अंधाराचा फायदा घेत रोज थोडे थोडे भाग खुले केले जातात. आणि अचानक एक दिवस हे लोखंडी भाग गायब केले जातात.

एमआयडीसी भागात अनेक ठिकाणी असे लोखंडी सुरक्षा कठडे चोरी केले जात असून ही लज्जास्पद बाब आहे. असे कठडे नसल्याने वाहनचालक आणि प्रवासी यांच्या जिवाला धोका पोचू शकतो. प्रशासनाने अशा चोरांवर कडक कारवाई करावी.
- बाबाजी ढोबळे, प्रवासी

क्रॅश बॅरियर हे अपघाताची शक्यता असणाऱ्या ठिकाणी वाहनांच्या सुरक्षेसाठी लावले जातात. परंतु, त्याची चोरी होणे ही दुर्दैवाची बाब आहे. प्रवासी नागरिकांच्या सुरक्षेसाठी याची चोरी न होणे गरजेचे आहे. जर कोणी अशी चोरी करताना आढळले तर कडक कायदेशीर कारवाई केली जाईल.
- संतोष पवार, शाखा अभियंता, सार्वजनिक बांधकाम विभाग