क्षमतेपेक्षा अधिक मालाची वाहतूक जीवघेणी

आंबेठाण, ता. १४ : चाकण एमआयडीसी भागात रात्रीच्या वेळी गौण खनिजांची वाहतूक होत आहे. मंजूर क्षमतेपेक्षा अधिकची वाहतूक होत असल्याने जास्तीचा माल रस्त्यावर पडून अपघात होत आहे. मोठमोठे दगड रस्त्यावर पडत असल्याने रस्ते खराब तर होतातच परंतु दुचाकी आणि चारचाकी मोटारीच्या अपघातांचे प्रमाण वाढत आहे.त्यामुळे अशी जीवघेणी वाहतूक करणाऱ्या वाहनचालकांवर कारवाई करावी अशी मागणी जोर धरत आहे.
एमआयडीसी भागात होणारे बरेच अपघात हे अवजड वाहने आणि क्षमतेपेक्षा जास्त मालाची वाहतूक करणाऱ्या वाहनांमुळे होत आहे. चाकण औद्योगिक क्षेत्रासह परिसरात कारखाने उभारणीची कामे, जमीन भराव आणि रस्त्याची कामे सुरू असल्याने डबर, मुरूम, मातीला मागणी आहे. मुरूम माती उपसा करण्यासाठी महसूल विभागाकडून गौण खनिज रॉयल्टी काढावी लागते. परंतु अनेकजण किरकोळ ब्रास मालाची रॉयल्टी काढून त्याबदल्यात हजारो ब्रास मुरूम, मातीचा उपसा करतात. यासाठी डोंगर, टेकड्यांची लचकेतोड होत आहे. लाखो रुपयांच्या गौण खनिजांची चोरी होत असताना देखील महसूल विभाग गप्प का आहे? याचे कारण मात्र गुलदस्त्यात आहे.
रात्रीच्या वेळी रस्त्यावर पडलेला माल दुचाकी, चारचाकी मोटर वाहनचालकांना दिसत नसल्याने अपघात होत आहेत. यात काहींना आपला जीव गमवावा लागला आहे. अशाप्रकारे बेकायदा गौण खनिजांची ओव्हर लोड क्षमतेपेक्षा अधिक वाहतूक करणाऱ्या वाहनांवर कारवाई कोण करणार? असा प्रश्‍न उपस्थित होत आहे. बऱ्याच वेळा गतिरोधकावरून वाहन आदळल्याने माल खाली पडतो. तर काही वेळा कुणाला गाडीत माल सापडू नये म्हणून रस्त्यावरच गौणखनिजांचा माल टाकला जातो. त्यामुळे वाहतुकीला अडथळा निर्माण होतो.

abt 14 p1.