वासुली ते सुदुंबरे रस्ता अद्यापही बंदच

आंबेठाण, ता.१५ : वासुली ते सुदुंबरे असा खेड आणि मावळ तालुक्याला जोडणारा रस्ता मागील कित्येक महिन्यापासून बंद आहे.एनडीआरएफच्या बाजूने जाणारा रस्ता दुरुस्तीसाठी आणि त्यानंतर संरक्षण भिंत दुरुस्तीसाठी मागील सात ते आठ महिन्यांपासून बंद आहे.यामुळे नागरिकांची प्रचंड गैरसोय होत असून किमान हलकी वाहने आणि दुचाकी यांच्यासाठी तो रस्ता चालू करावा अशी मागणी नागरिकांकडून केली जात आहे.
वासुली बाजूकडून सुदुंबरे गावाकडे जाणाऱ्या रस्त्याचे काम काही महिन्यांपूर्वी पूर्ण झाले होते.परंतु सुदुंबरेकडील काम बाकी असल्याने सध्या या कामाची दुरुस्ती सुरू होती.ही दुरुस्ती सुरू असतानाच एनडीआरएफची संरक्षण भिंत पावसात कोसळली. त्यामुळे या भिंतीचे देखील दुरुस्तीचे काम सुरू करण्यात आले. परंतु या दुरुस्तीच्या कामाला सात ते आठ महिन्यांचा कालावधी लोटला आहे. सध्या हे काम अंतिम टप्प्यात आले असले तरी ते अतिशय संथ गतीने सुरू आहेत. त्यामुळे स्थानिकांसह प्रवाशांचे मोठ्या प्रमाणात हाल होत आहे. त्यांना दूरवर वळसा घालून इच्छित स्थळी जावे लागत आहे. खेड तालुक्यातील नागरिकांचा पुणे, पिंपरी चिंचवड, देहू, देहूरोड या भागाशी नित्याचा संपर्क आहे. त्यामुळे या मार्गाची तत्काळ दुरुस्ती करावी आणि लवकरात लवकर हा रस्ता वाहतुकीसाठी खुला करावा, अशी मागणी केली जात आहे.

खेड तालुक्यात चाकण एमआयडीसी टप्पा क्रमांक दोनमध्ये येण्यासाठी एचपी चौक,खालुंब्रे चौक आणि सुदुंबरे मार्ग असे रस्ते आहेत; परंतु एचपी चौक आणि खालुंब्रे चौकात मोठ्या प्रमाणात वाहतूक कोंडी होत असल्याने नागरिकांना सुदुंबरे मार्ग अतिशय सोईस्कर आहे.त्यामुळे हा मार्ग तत्काळ सुरू करावा अशी मागणी खेड तालुका भाजप ग्रामीण मंडलचे अध्यक्ष सुनील देवकर यांनी केली आहे.