विजेचा धक्का बसून दुभत्या गायीचा मृत्यू

आंबेठाण, ता. १७ : शिवे (ता. खेड) येथील वावळेवाडी येथे विजेचा धक्का बसून एक गाय मृत्यूमुखी पडली. दुभती गाय मृत्यू पावल्याने शेतकऱ्यांचे मोठे आर्थिक नुकसान झाले आहे. त्यामुळे वीज वितरण कंपनीकडून आर्थिक नुकसान भरपाई मिळावी, अशी मागणी या शेतकरी कुटुंबाने केली आहे.
शिवे येथील शेतकरी रामदास धोंडिबा साकोरे यांच्या घराजवळ बांधलेल्या गायीला लगतच्या विजेच्या खांबावर असलेल्या तारांचा धक्का लागला आणि यात गाय मरण पावली. या शेतकऱ्याची आर्थिक परिस्थिती हलाकीची आहे. त्यामुळे महावितरण कंपनीकडून नुकसानभरपाई मिळावी, अशी मागणी माजी सरपंच अक्षय शिवेकर व उपसरपंच आनंद साकोरे यांनी केली आहे.
दरम्यान, गावातील दोन ते तीन ठिकाणी अशीच धोकादायक परिस्थिती आहे. तेथेदेखील मुकी जनावरे आणि नागरिकांच्या जीवाला धोका आहे. वर्षभरापासून वारंवार दुरुस्तीची मागणी करूनही महावितरण दुर्लक्ष करत असल्याचा आरोप माजी सरपंच अक्षय शिवेकर यांनी केला आहे.