पिंपळसुटीत वळणावर भरधाव टेम्पो उलटला

आंधळगाव, ता. २७ : पिंपळसुटी (ता. शिरूर) येथील बस स्थानकासमोर भरधाव टेम्पो धोकादायक वळणाचा अंदाज न आल्याने मुख्य रस्त्याच्या लगत उलटल्याची घटना मंगळवारी (ता. २७) सकाळी ११ वाजण्याच्या सुमारास घडली. या अपघातात टेम्पोचे मोठे नुकसान झाले असून, चालक थोडक्यात बचावला आहे. चालकाला स्थानिक ग्रामस्थांच्या मदतीने टेम्पोतून त्वरित बाहेर काढत दवाखान्यात दाखल केले आहे. पिंपळसुटी येथे रस्त्याच्या धोकादायक वळणामुळे या रस्त्यावर सतत अपघात होत आहेत. सतत होणाऱ्या अपघाताच्या घटनांमुळे परिसरातील नागरिक संतप्त झाले आहेत.
या अपघातातील टेम्पो (क्र. एम.एच. ०९ बी.सी. ५९२३) आळेफाट्याहून बारामतीकडे चालला होता. यावेळी भरधाव वाहनचालकाचे वाहनावरील नियंत्रण सुटल्याने टेम्पो मुख्य रस्त्यालगत उलटला. अपघातात वाहनचालकाला किरकोळ दुखापत झाली असून, कुठलीही जीवितहानी झालेली नाही. टेम्पोचे मोठे नुकसान झाले आहे.