कुरुळीत मुंगूस समोर आल्याने बचावल्या सासू-सुना

आंधळगाव, ता. १३ : कुरुळी (ता. शिरूर) येथे उसात दबा धरून बसलेला बिबट्या झडप घालण्याच्या तयारीत असताना अचानक त्याच्यासमोर मुंगुस आल्याने शेतात काम करणाऱ्या लक्ष्मीबाई कुतवळ (सासू) व पत्नी राजश्री कुतवळ (सून) बचावल्या आहेत. गुरुवारी (ता. १२) सकाळी ११ वाजता ही घटना घडली.
मांडवगण फराटा हद्दीतील घाडगेतळई येथे व्यायामाला जात असलेल्या दोन महिला बिबट्याच्या हल्ल्यात बचावल्याची घटना ताजी असतानाच आता पुन्हा एकदा कुरुळी येथे घटना घडल्याने परिसरातील शेतकरी व महिला मजुरांमध्ये भीतीचे वातावरण निर्माण झाले आहे. हा प्रकार महिलांच्या समोर घडल्याने त्या भयभीत होऊन त्यांनी आरडाओरडा सुरू केला. राहुल कुतवळ यांनी याबाबत पोलिस पाटील संदीप पवार यांना माहिती दिली. त्यानंतर सायंकाळी साडे सहा वाजण्याच्या सुमारास रेस्क्यू टीमचे सदस्य घटनास्थळी दाखल झाले. गेल्या अनेक दिवसांपासून सातत्याने शिरूर तालुक्यातील पूर्व भागातील अनेक गावांत बिबट्याच्या हल्ला सत्राने नागरिक भयभीत झाले असून वनविभागाने या परिसरात त्वरित पिंजरा लावून बिबट्याला जेरबंद करावे, अशी मागणी स्थानिक नागरिकांकडून केली जात आहे.