इमानगावचे सुपुत्र मुख्यमंत्र्यांचे विशेष कार्य अधिकारी

मांडवगण फराटा, ता. ८ : इनामगाव (ता. शिरूर) येथील सिद्धेश्‍वर फत्तेसिंग मोकाशी यांची मुख्यमंत्री देवेंद्र फडणवीस यांच्या कार्यालयात विशेष कार्य अधिकारी (अवर सचिव) म्हणून नुकतीच पदोन्नती झाली आहे. यापूर्वी त्यांनी महसूल, पशू व दुग्ध संवर्धन खात्याचे विशेष कार्य अधिकारी म्हणून काम पाहिले आहे. त्यांच्या निवडीबद्दल इनामगाव ग्रामस्थ व शिरूर तालुक्यातील सर्व स्तरातून त्यांचे अभिनंदन केले जात आहे.
सिद्धेश्‍वर मोकाशी हे शिरूर तालुक्यातील इनामगाव येथील शिरूर कृषी उत्पन्न बाजार समितीचे माजी उपाध्यक्ष कै. फत्तेसिंग मोकाशी यांचे सुपुत्र, तर श्रीगोंदा कारखान्याचे संचालक व उपसरपंच विजयसिंह मोकाशी व घोडगंगा कारखान्याचे संचालक दिलीप मोकाशी यांचे बंधू आहेत. मोकाशी यांनी २०११ ते २०१३ या कालावधीत माजी मुख्यमंत्री पृथ्वीराज चव्हाण यांचे स्वीय सहाय्यक, २०१४ ते २०१९ या कालावधीत तत्कालीन मुख्यमंत्री देवेंद्र फडणवीस यांचे विशेष कार्य अधिकारी, तसेच महाविकास आघाडी सरकारचे मुख्यमंत्री उद्धव ठाकरे यांच्या कार्यालयात विशेष कार्य अधिकारी म्हणून २०१९ ते २०२२ या कालावधीत काम केले आहे. त्यानंतर महायुतीचे महसूल, पशू व दुग्ध विकास खात्याचे मंत्री राधाकृष्ण विखे पाटील यांच्या कार्यालयात २०२२ ते २०२४ या अडीच वर्षांच्या कालखंडात विशेष कार्य अधिकारी म्हणून काम केले आहे. पुन्हा एकदा मुख्यमंत्री देवेंद्र फडणवीस यांच्या कार्यालयात विशेष कार्य अधिकारी म्हणून त्यांची नियुक्ती करण्यात आली आहे. तीन मुख्यमंत्र्याच्या मार्गदर्शनाखाली काम करण्याचा त्यांना दांडगा अनुभव आहे. पशू व दुग्ध विकास खात्यात काम करताना गोसेवा आयोगाची स्थापना, गाईच्या दुधाला अनुदान असे महत्त्वाचे उपक्रम त्यांनी राबवले. मंत्री राधाकृष्ण विखे यांच्या मार्गदर्शनाखाली व सिद्धेश्‍वर मोकाशी यांच्या नियोजनातून भारतातील सर्वांत मोठे प्रदर्शन शिर्डी येथे भरविले गेले.