इनामगावात कुटुंबाला टोळक्याकडून मारहाण

मांडवगण फराटा, ता. ९ : महिलेची छेडछाड काढल्यानंतर झालेल्या भांडणाचा राग मनात धरून दहा जणांच्या टोळक्याने महिलेसह तीच्या कुटुंबीयांना घरासमोर येऊन बेदम मारहाण करत जीवे मारण्याचा प्रयत्न केला. इनामगाव (ता. शिरूर) येथे बुधवारी (ता. ७)सकाळी ७ वाजण्याच्या दरम्यान ही घटना घडली.
याबाबत रूपाली अतिश चव्हाण (रा. इनामगाव) यांनी शिरूर पोलिसात फिर्याद दिली. मनीषा अंकुश काळे (रा. मांडवगण फराटा), दिनेश अंकुश काळे, अक्षय अंकुश काळे, हरिदास संपत भोसले, लैलाबाई हरिदास भोसले, लल्ला हरिदास भोसले, कबई अंकुश काळे (सर्व रा.गणेगाव दुमाला, ता. शिरूर), चिंटू काळे (पूर्ण नाव माहीत नाही, रा. दौंड टोलनाक्याजवळ, ता. दौंड), प्रदीप पूर्ण नाव माहीत नाही (रा. श्रीगोंदा, ता. जि. अहिल्यानगर), लाली नवनाथ चव्हाण (रा. गारमाळ- मांडवगण फराटा), अशी गुन्हा दाखल केलेल्या संशयित आरोपींची नावे आहेत.
पोलिसांनी दिलेल्या माहितीनुसार, फिर्यादी रूपाली चव्हाण या इनामगाव येथे आपल्या कुटुंबासह राहते. बुधवारी (ता. ७) सकाळी ७ वाजण्याच्या सुमारास त्यांच्या घरातील लोक झोपले होते. यावेळी आरोपी दिनेश काळे याने बेकायदा जमाव जमवून फिर्यादी महिलेची छेड काढली. दिनेश याच्याबरोबर झालेल्या भांडणाच्या रागातून आरोपींनी फिर्यादी महिला, तसेच पवन भुजाबा चव्हाण, शिन्नर भुजाबा चव्हाण, सासू सुजी शिन्नर चव्हाण, बापू काळे, धनराज काळे, चिप्पट भुजाबा चव्हाण, शुभम पवन चव्हाण यांना लोखंडी कोयता, लोखंडी रॉड, सत्तूर, लाकडी हॉकी स्टीक, लाकडी दांडके, दगडाने, तसेच लाथाबुक्क्यांनी मारहाण केली. तसेच, शिवीगाळ व दमदाटी करून जीवे मारण्याची धमकी देत गंभीर मारहाण केल्याचे फिर्यादीत म्हटले आहे. याबाबत पोलिसांनी दहा जणांच्या विरोधात गुन्हा दाखल केला आहे. या घटनेचा पुढील तपास पोलिस उपनिरीक्षक नकाते करत आहेत.