बांबूचा आधार काढत महावितरणने उभारले खांब

सकाळ इम्पॅक्ट

मांडवगण फराटा, ता. ५ : गणेगाव दुमाला (ता. शिरूर) येथील म्हसोबावस्ती येथे विद्युत तारांना दिलेला बांबूचा आधार अखेर महावितरणने काढून टाकला आहे. झोळ असलेल्या ठिकाणच्या विद्युत तारा बदलून तेथे बंच केबल टाकल्याने स्थानिक नागरिकांनी समाधान व्यक्त केले आहे. दै. ‘सकाळ’ ने २२ मे रोजी ‘गणेगावात विजेच्या तारांना बांबूचा आधार’ या मथळ्याखाली वृत्त प्रसिद्ध केले होते. महावितरणने या वृत्ताची तत्काळ दखल घेत कार्यवाही केल्याने ग्रामस्थांमधून समाधान व्यक्त होत आहे.
म्हसोबावाडी येथे रस्त्याच्या बाजूला मोठ्या प्रमाणात तारा लोंबकळत असल्याने स्थानिक नागरिकांनी त्याला बांबूचा आधार दिला होता. या विद्युत तारांच्या खालील बाजूने ऊस वाहतूक करणे धोकादायक बनले होते. ऊस वाहतूक करताना अनेक तारा तुटण्याचे प्रकार घडत होते. विद्युत तारांच्या खाली कांदा चाळी असल्याने शेतकऱ्यांना वावरणे अवघड झाले होते. या परिसरात जिल्हा परिषदेची शाळा असल्याने येथील विद्यार्थ्यांना प्रवास करणे जिकिरीचे झाले होते. तसेच विद्युत तारांना लावलेल्या बांबूमुळे अपघाताचा धोका निर्माण झाला होता. याबाबत वृत्त प्रसिद्ध झाल्यानंतर या वृत्ताची दखल घेत महावितरणचे शिरूर उपकार्यकारी अभियंता सुमीत जाधव यांनी म्हसोबावाडी येथे गरजेच्या ठिकाणी विद्युत खांब व अन्य ठिकाणी विद्युत तारा बदलून बंच केबल टाकण्याचे कर्मचाऱ्यांना आदेश दिले. त्यानुसार मांडवगण फराटाचे कनिष्ठ शाखा अभियंता इर्शाद शेख व कर्मचाऱ्यांनी तत्काळ कार्यवाही करत बंच केबल टाकून दिल्या आहेत. त्यामुळे शेतकऱ्यांनी समाधान व्यक्त केले.

सध्या पावसाळ्याचे दिवस सुरु झाले असून वाकलेले विद्युत खांब पडण्याचे प्रमाण जास्त आहे. धोकादायक असलेले खांब व अथवा तारांची नागरिकांनी महावितरणला तत्काळ माहिती दिल्यास हे काम प्राधान्याने केले जाईल.
- सुमीत जाधव, उपकार्यकारी अभियंता, महावितरण, शिरूर