मांडवगणमधील वाकलेल्या खांबाची अखेर दुरुस्ती

मांडवगण फराटा, ता. १२ : शिरूर तालुक्यातील आंधळगाव-तांदळी रस्त्यावर मांडवगण फराटा येथील चिंचेचा मळा येथे रस्त्याच्या बाजूला वाकलेल्या विद्युत खांबाची अखेर ‘महावितरण’ने दुरुस्ती केली. पंधरा दिवसांपासून वाकलेल्या अवस्थेत असलेल्या विद्युत खांबाची दुरुस्ती झाल्याने स्थानिक नागरिकांनी समाधान व्यक्त केले.
मांडवगण- तांदळी रस्त्याच्या बाजूला चर नसल्याने शेतकऱ्यांच्या शेतात मोठ्या प्रमाणात पाणी तुंबले होते. सार्वजनिक बांधकाम विभागाने जेसीबीच्या साहाय्याने रस्त्याच्या बाजूला चर खोदला होता. चर खोदल्याने माती ढिसाळ होऊन तीन विद्युत खांब वाकले होते. एक विद्युत खांब थेट एका शेतकऱ्याच्या घराच्या भिंतीवर कोसळला होता. तसेच, एक खांब आंधळगाव-तांदळी रस्त्यावर वाकला होता. वादळी वारा सुटल्यास हे वाकलेले खांब रस्त्यावर कोसळून जीवितहानी होण्याची शक्यता निर्माण झाली होती. वाकलेल्या खांबाबाबत तक्रारी करूनही दखल घेत नसल्याने स्थानिक नागरिक आक्रमक झाले होते. याबाबत ‘सकाळ’ने ५ जून रोजी ''वाकलेल्या खांबामुळे अपघातांना निमंत्रण'' या मथळ्याखाली वृत्त प्रसिद्ध केले होते. या वृत्ताची दखल घेत महावितरणचे शिरूर उपकार्यकारी अभियंता सुमीत जाधव यांनी मांडवगण फराटा येथील धोकादायक वाकलेले विद्युत खांब सुस्थितीत उभे करण्याचे कर्मचाऱ्यांना आदेश दिले होते. त्यानुसार मांडवगण फराटाचे कनिष्ठ शाखा अभियंता इर्शाद शेख व कर्मचाऱ्यांनी तत्काळ कार्यवाही करत विद्युत खांब उभे केले आहेत. त्यामुळे शेतकऱ्यांनी समाधान व्यक्त करत ‘सकाळ’चे आभार मानले.