अस्वच्छ स्वीट होमवर मांडवगणध्ये कारवाई

मांडवगण फराटा, ता. १३ : अस्वच्छ वातावरणात भेसळयुक्त अन्नपदार्थाचे विनापरवाना उत्पादन करून त्याची विक्री करत असलेल्या मांडवगण फराटा (ता. शिरूर)येथील बेकरीसह एका स्वीट होमवर अन्न व औषध प्रशासनाने कारवाई केली.
मांडवगण फराटा परिसरात काही स्वीट होम व बेकरी व्यावसायिक अस्वच्छ वातावरणात भेसळयुक्त अन्नपदार्थाचे विनापरवाना उत्पादन करून विक्री करत असल्याबाबत अन्न व औषध प्रशासन पुणे कार्यालयाकडे तक्रार प्राप्त झाली होती. त्या अनुषंगाने अन्न व भेसळ कार्यालयाचे अन्न सुरक्षा अधिकारी लक्ष्मीकांत सावळे यांनी येथील फेमस बेकरी, महालक्ष्मी स्वीट, भारत बेकर्स या पेढीची तपासणी केली. यादरम्यान फेमस बेकरी ही विनापरवाना अन्नपदार्थ विक्री व्यवसाय असल्याचे निदर्शनास आले. यावेळी फेमस बेकरी या पेढीस व्यवसाय बंद ठेवण्याबाबत लेखी निर्देश देण्यात आले. तपासणीवेळी महालक्ष्मी स्वीट या पेढीत काही त्रुटी आढळून आल्या. त्यामुळे अन्न व भेसळचे सहायक आयुक्त (अन्न) बा. म. ठाकूर यांनी या दुकानाला दहा हजार रुपये इतका दंड ठोठावला आहे.
अन्न पदार्थामध्ये भेसळीसंदर्भात नागरिकांच्या काही तक्रारी असल्यास त्यांनी प्रशासनाच्या १८००२२२३६५ या टोल फ्री क्रमांकावर संपर्क साधण्याचे आवाहन अन्न व औषध प्रशासनाचे पुणे विभागाचे सह आयुक्त (अन्न) सुरेश अन्नपुरे यांनी केले आहे.