अडीच लाखांचा ऐवज वडगाव रासाईत लंपास

आंधळगाव, ता.१२ : वडगाव रासाई (ता.शिरूर) येथे घराचे कुलूप तोडून अडीच तोळ्याचा गंठण, रोख रक्कमेसह दुचाकी असा एकूण दोन लाख ५० हजार रुपयांचा मुद्देमाल अज्ञात चोरट्यांनी चोरून नेला. ही घटना शनिवारी (ता.१२) रात्री साडे बारा ते पहाटे चार वाजण्याच्या सुमारास वडगाव येथील तळईमाळ येथे ही घटना घडली.
याबाबत प्रसाद दिगंबर ढवळे (वय २२,रा.वडगाव रासाई ता.शिरूर जि.पुणे)यांनी दिलेल्या फिर्यादीनुसार मांडवगण फराटा पोलिसांनी अज्ञात चोरटयांच्या विरोधात गुन्हा दाखल केला आहे. पोलिसांनी दिलेल्या माहितीनुसार, फिर्यादी प्रसाद हे हॉटेल व्यावसायिक आहे. ते आई व वडिलांसह वडगाव रासाई येथे राहतात. शनिवारी (ता.१२) रात्री किचनच्या दरवाजाचे कुलूप तोडून दागिने व रोख रक्कम तसेच घरासमोर हॅन्डेल लॉक करून उभी केलेली (क्र एम.एच.१२ एक्स आर.६६३५) ही दुचाकी चोरट्यांनी चोरून नेल्याचे ढवळे यांच्या निदर्शनास आले. तसेच कपाटात ठेवलेले दीड लाखांचे अडीच तोळ्याचे सोन्याचे गंठण, रोख रक्कम ५५ हजार व ४५ हजार रुपये किमतीची दुचाकी असा अडीच लाखांचा ऐवज अज्ञात चोरट्यांनी लंपास केल्याचे फिर्यादीत म्हटले आहे.