मांडवगण हल्ला प्रकरणातील आरोपींचे छायाचित्र प्रसिद्ध

मांडवगण फराटा, ता. २२ : मांडवगण फराटा (ता. शिरूर) येथील अकरावा मैल येथे एकोणीस वर्षीय तरुणावर प्राणघातक हल्ला झाला होता. या घटनेतील आरोपीचे छायाचित्र संबंधित तरुणाच्या आई-वडिलांनी केलेल्या वर्णनावरून पोलिसांनी प्रसिद्ध केले. चित्राच्या आधारे आरोपीचा शोध सुरू असल्याची माहिती शिरूर पोलिस ठाण्याचे पोलिस निरीक्षक संदेश केंजळे यांनी दिली.
मांडवगण फराटा येथे बुधवारी (ता. १६) रात्री जेवण करत असताना पवार यांच्या घरात घुसून दोघांनी त्यांच्या १९ वर्षीय मुलावर प्राणघातक हल्ला केला होता. आरोपींनी प्रज्वल पवार (वय १९) याच्या गळा व मानेवर धारदार शस्त्राने वार केले. या हल्ल्यात तो गंभीर जखमी झाला. त्यानंतर हल्लेखोर शेतवस्तीतून फरार झाले. वरिष्ठ पोलिस अधिकाऱ्यांनी घटनास्थळी भेट दिली होती. दरम्यान, पोलिसांनी संबंधित घटनेतील संशयित आरोपीचे छायाचित्र प्रसिद्ध केले आहे. आरोपीबाबत काही माहिती असल्यास शिरूर पोलिस स्टेशनचे पोलिस निरीक्षक संदेश केंजळे(मो. ७४९९९३९०९९), हनुमंत नकाते, पोलिस उपनिरीक्षक शुभम चव्हाण (मो. ८२०८३५५२१७) यांच्याशी संपर्क साधण्याचे आवाहन पोलिसांनी केले आहे.