श्रीगोंदा आगाराची बस मांडवगण फराट्याच्या सेवेत

मांडवगण फराटा, ता. ३ : शिरूर आणि श्रीगोंदा या दोन तालुक्यांना जोडणारी मांडवगण फराटा ते श्रीगोंदा मार्गावर राज्य मार्ग परिवहन महामंडळाची नवीन बससेवा सुरू करण्यात आली आहे. या बससेवेचे तांदळी (ता. शिरूर) येथे गुरुवारी (ता. ३१) उत्साहात स्वागत करण्यात आले. ही बससेवा सुरु झाल्याने प्रवासी, विशेषतः विद्यार्थी, नोकरदार वर्गाला दिलासा मिळाला आहे.
तांदळी ग्रामपंचायतीच्या सरपंच रेखा गदादे यांच्या हस्ते श्रीगोंदा आगाराचे व्यवस्थापक संदीप ढवळे, दिगंबर दरेकर यांच्यासह चालक-वाहक यांचा सत्कार करण्यात आला. या मार्गावर बससेवा सुरू करण्यासाठी सरपंच रेखा गदादे यांनी श्रीगोंदा आगाराकडे सातत्याने पाठपुरावा केला होता. त्यांच्या प्रयत्नांना यश येत अखेर बससेवा सुरू करण्यात आली. ही बस सेवा दररोज असणार असून लिंपणगाव (श्रीगोंदा), काष्टी, तांदळी, माळवाडी, गारमाळ, मांडवगण फराटा या मार्गांवर थांबे असतील. ग्रामस्थांनी या निर्णयाचे स्वागत करत प्रशासनाचे आभार मानले. यावेळी काळुराम खोरे, दत्तात्रेय गदादे, श्यामराव कळसकर, पोपट गदादे, दिलीप सोनवणे, सुभाष कळसकर, मधुकर गदादे, सावता गदादे, मारुती गदादे, डॉ. गणेश कळसकर उपस्थित होते.

बस वेळापत्रक:
सकाळची फेरी
▪ ८:०० - श्रीगोंदा येथून मांडवगण फराटाकडे
▪ ८:४५ - आगमन (मांडवगण फराटा)
▪ ८:५० - परतीची बस मांडवगण फराट्याहून
▪ ९:३५ - आगमन (श्रीगोंदा)

दुपारची फेरी
▪ ३:४५ - श्रीगोंदा येथून मांडवगण फराटाकडे
▪ ४:३० - आगमन (मांडवगण फराटा)
▪ ४:३५ - परतीची बस (मांडवगण फराटा)
▪ ५:२० - श्रीगोंदा