शिरसगाव काटा येथे घरातून दोन लाखांचे दागिने चोरीस

आंधळगाव, ता. ६ : शिरसगाव काटा (ता. शिरूर) येथे घराचा मुख्य दरवाजा उघडा असल्याचा गैरफायदा घेऊन चोरट्यांनी घरातील पेट्यांमधील साडेपाच तोळे सोन्याचे दागिने लंपास केले.
याबाबत बाबूराव म्हाता गोरे (वय ३६, रा. शिरसगाव काटा) यांनी शिरूर पोलिस ठाण्यात फिर्याद दिली आहे. ते आपल्या कुटुंबासह सोमवारी (ता. ४) रात्री नेहमीप्रमाणे घराचा मुख्य दरवाजा न लावता जेवण करून शेजारच्या खोलीत झोपायला गेले. मंगळवारी पहाटे सुमारे दीड वाजता त्यांच्या आईने आरडाओरड केल्याचा आवाज आल्याने ते उठले. त्यावेळी पाहणी केली असता घरातील साहित्य अस्ताव्यस्त पडलेले दिसले. चोरट्यांनी सोमवारी सकाळी ९ वाजल्यापासून ते मंगळवारी (ता. ५) पहाटे दीड वाजेपर्यंतच्या कालावधीत घरात प्रवेश केला. या दरम्यान चोरट्यांनी घरातील दोन पत्र्याच्या पेट्या फोडून त्यातील अक्कासाहेब डोरले (सुमारे २ तोळे ५ ग्रॅम) व सोन्याच्या पुतळ्या (सुमारे ३ तोळे), असा एकूण साडेपाच तोळे सोन्याचा ऐवज चोरून नेला. चोरीस गेलेल्या दागिन्यांची अंदाजे किंमत २ लाख २० हजार रुपये इतकी असल्याचे फिर्यादीत नमूद आहे.
या चोरीबाबत कोणाला काही माहिती असल्यास त्यांनी शिरूर पोलिस ठाण्याच्या ७७३८६०११९१ या क्रमांकावर संपर्क साधावा, असे आवाहन पोलिसांनी केले आहे.