चोरट्यांच्या मारहाणीत शिरसगावात महिला जखमी

आंधळगाव, ता. ११ : शिरसगाव काटा (ता. शिरूर) येथील चव्हाणवाडी येथे सोमवारी (ता. ११) मध्यरात्री साडेबारा वाजण्याच्या सुमारास चोरट्यांनी झोपेत असलेल्या महिलेला मारहाण करून सोन्याचे दागिने व लोखंडी पेट्या पळवल्या. या घटनेत तब्बल १ लाख २० हजार रुपयांचा ऐवज चोरून नेण्यात आला आहे. चोरट्यांनी गळ्यातील मणी मंगळसूत्र, गंठण व कानातील फुले ओरबाडून घेतल्याने महिला जखमी झाली आहे. गंभीर जखमी झालेल्या अलका अशोक कुंजीर यांच्यावर खासगी रुग्णालयात उपचार सुरू आहेत.
अमोल अशोक कुंजीर (वय ३१, रा. चव्हाणवाडी, शिरसगाव काटा) यांच्या फिर्यादीवरून मांडवगण फराटा पोलिसांनी अज्ञात चोरट्यांविरोधात गुन्हा दाखल केला आहे. पोलिसांकडून मिळालेल्या माहितीनुसार, फिर्यादी अमोल कुंजीर हे कुटुंबासह रविवारी (ता. १०) रात्री १०.१५ वाजता जेवण करून झोपले होते. दरवाजा उघडाच होता. त्याचा गैरफायदा घेत मध्यरात्री चोरट्यांनी घरात प्रवेश करून महिलेला मारहाण केली व दागिने ओरबाडून घेतले.
या घटनेनंतर अलका कुंजीर यांच्या आरडाओरडीनंतर कुटुंबीयांनी धाव घेतली असता त्यांच्या कान व तोंडातून रक्त येत होते. त्यांना तातडीने काष्टी येथील खासगी रुग्णालयात हलविण्यात आले. चोरीस गेलेल्या दागिन्यांमध्ये दोन गंठण, कानातील फुले, वेल व मणी मंगळसूत्र, असा एकूण १ लाख २० हजार रुपयांचा ऐवज असल्याचे फिर्यादीत नमूद केले आहे.
दरम्यान, चोरीला गेलेल्या दोन लोखंडी पेट्या सकाळी पिंपळसुटी गावच्या हद्दीत सापडल्या, मात्र त्यातील काही दागिने गायब होते. पोलिसांनी अज्ञात चोरट्यांचा शोध सुरू केला आहे.