सर्पदंशातून वाचला सादलगावील मुलगा

मांडवगण फराटा, ता. १९ : अंगणात खेळत असताना अतिविषारी सापाने सर्पदंश केल्यानंतरही वेळेत मिळालेल्या योग्य उपचारांमुळे चिमुकल्याचा वाचला. समर्थ संतोष पवार (रा.सादलगाव, ता.शिरूर) असे त्या मुलाचे नाव आहे. तो पाचवीत शिकतो.
सादलगावत शुक्रवारी (ता.१५) दुपारी अंगणात मित्रांसोबत खेळताना समर्थला अचानक अतिविषारी सापाने दंश केला. त्याने तत्काळ घरच्यांना याची माहिती दिली. ग्रामस्थांनी त्याला मांडवगण फराटा प्राथमिक आरोग्य केंद्रात दाखल केले. यावेळी तेथील वैद्यकीय अधिकारी डॉ.नितीन फटाले यांनी समर्थची प्रकृती बिघडत असल्याचे ओळखून वेळ न दवडता त्याला पुढील उपचारासाठी दौंड येथे हलवले. मात्र, तेथे ऑक्सिजनची सुविधा उपलब्ध नसल्याने समर्थला खासगी रुग्णालयात दाखल केले. दोन दिवसांच्या उपचारानंतर समर्थला घरी सोडण्यात आले. डॉ.नितीन फटाले, सर्पमित्र संभाजी केसवड, डॉ.प्रतीक दिवेकर यांच्यासह ग्रामस्थांनी देवदूताप्रमाणे मदत केली, म्हणूनच माझा मुलगा वाचला, अशा भावनिक शब्दांत समर्थचे वडील संतोष पवार यांनी कृतज्ञता व्यक्त केली.