निर्वीत शेतकऱ्यावर कोयता, लोखंडी रॉड, पाइपने हल्ला

आंधळगाव, ता.१० : निर्वी (ता.शिरूर) येथे जमीन मोजणीच्या कारणावरून शेतकऱ्यावर कोयता, लोखंडी रॉड व पाइपने हल्ला केल्याची घटना घडली. याप्रकरणी चौघांविरोधात शिक्रापूर पोलिस ठाण्यात गुन्हा दाखल करण्यात आला आहे. या हल्ल्यात शेतकरी संदीप भगवान वाघचौरे (वय ३८,रा.आलेगाव पागा,ता.शिरूर) हे जखमी झाले असून त्यांच्यावर शिरूर येथील खासगी रुग्णालयात उपचार सुरू असून त्यांनीच फिर्याद दिली आहे. तर प्रकाश गोविंद पवार, रामदास गोविंद पवार, मयूर पवार (पूर्ण नाव माहीत नाही) व वैशाली प्रकाश पवार (सर्व रा.निर्वी,ता.शिरूर) अशी गुन्हा दाखल झालेल्यांची नावे आहेत. दरम्यान, फिर्यादी वाघचौरे यांची मोटार, मोटारसायकलीचेही नुकसान केले असून मोबाइलमधील व्हिडिओ डिलीट करण्यासही आरोपींनी भाग पाडले. पुढील तपास शिरूर पोलिस करत आहेत.