आंधळगावात आतषबाजी

आंधळगाव, ता. ५ : आंधळगाव (ता. शिरूर) येथील दत्तमंदिर परिसर गुरुवारी (ता. ५)पहाटेपासून भाविकांनी फुलून गेला होता. पहाटे काकड आरती, महाभिषेक, गुरुचरित्र पारायण आणि विविध धार्मिक उपक्रमांनी परिसरातील वातावरण मंत्रमुग्ध झाले. संपूर्ण मंदिर परिसराला फुलांची सजावट, विद्युत रोषणाई केल्याने परिसर उजळून गेला होता. दत्तजयंतीनिमित्त मंदिरामध्ये सकाळी होमहवन, अभिषेक, पूजा, दत्तजन्मोत्सव, महाप्रसादाचा कार्यक्रम झाला. सायंकाळी मावळत्या सूर्याच्या सुवर्ण झळाळीत पारंपरिक दत्तजन्मोत्सव पाळणा सोहळा पार पडला. महिलांनी पारंपरिक पाळणा गीते गाताच भक्तांनी फुलांची उधळण करीत दत्तजन्माचा क्षण साजरा केला. कोळगाव डोळस येथील राजाराम महाराज जगताप यांचे फुलाचे कीर्तन झाले. त्यानंतर फटाक्यांची आतषबाजी करून सोहळा संपन्न झाला. महिलांसह भाविक भक्त तसेच भजनी मंडळ उपस्थित होते.