भावाकडून भावाला लोखंडी रॉडने मारहाण

आंधळगाव, ता. ७ : वडगाव रासाई (ता. शिरूर) येथे घरासमोरील शौचालयाच्या बांधकामाच्या कारणावरून सख्ख्या भावानेच भावावर लोखंडी रॉडने हल्ला केल्याची घटना घडली आहे. या प्रकरणी रोहिदास भाऊसाहेब लोखंडे (रा. वडगाव रासाई, ता. शिरूर) यांच्याविरोधात शिरूर पोलीस ठाण्यात गुन्हा दाखल करण्यात आला आहे. याबाबत सुभाष भाऊसाहेब लोखंडे (वय ६४ रा. वडगाव रासाई, ता. शिरूर) यांनी फिर्याद दिली आहे.
पोलिसांनी दिलेल्या माहितीनुसार, शनिवारी (ता. ४) दुपारी चारच्या सुमारास फिर्यादी सुभाष हे घरासमोर बसले असताना त्यांचे भाऊ रोहिदास तेथे आले. यावेळी शौचालय-बाथरूमचे काम सुरू असलेल्या गवंड्याला त्यांनी शिवीगाळ करण्यास सुरुवात केली तसेच शौचालयाच्या पाईपचे नुकसान केले. फिर्यादीने याबाबत जाब विचारला असता, ‘ही जागा माझी आहे, येथे बांधकाम करू नकोस,’ असे म्हणत आरोपीने शिवीगाळ केली. त्यानंतर तेथे पडलेल्या लोखंडी रॉडने फिर्यादीला खाली पाडून उजव्या हातावर, पाठीवर व छातीवर मारहाण करून दुखापत केली. तसेच जीवे मारण्याची धमकी देत शौचालयाच्या पाईपचे नुकसान केल्याचे फिर्यादीत नमूद आहे. या प्रकरणी शिरूर पोलीस ठाण्यात रोहिदास लोखंडे यांच्याविरुद्ध गुन्हा दाखल करण्यात आला असून पुढील तपास पोलीस हवालदार शिंदे करत आहेत.