निर्वी येथे विहिरीतील कृषी मोटर, पाईप चोरी

आंधळगाव, ता. १० : निर्वी (ता. शिरूर) येथील धुमाळवाडी रस्त्यालगत असलेल्या शेतजमिनीतून चोरट्याने पानबुडी मोटर व पाईप चोरी केले.
याप्रकरणी सुभाष बापूराव सोनवणे (मूळ रा. निर्वी, सध्या रा. शाहूनगर, चिंचवड) यांनी शिरूर पोलिस ठाण्यात फिर्याद दिली आहे. त्यानुसार, सोनवणे हे मूळचे निर्वी येथील रहिवासी असून कामानिमित्त पुणे येथे वास्तव्यास आहेत. त्यामुळे त्यांनी शेतीसाठी वाटेकरी नेमला आहे. बुधवारी (ता. ७) पहाटे साडेतीनच्या सुमारास वाटेकरी शेतातील पिकांना पाणी देऊन विहिरीवरील मोटर बंद करून घरी परतला होता. मात्र, त्याच दिवशी रात्री पुन्हा पाणी देण्यासाठी गेल्यानंतर विहिरीतील मोटरला जोडलेला काळा पाईप कापलेला, तसेच वायर तुटलेली आढळले. शुक्रवारी (ता. ९) सोनवणे यांनी शेतात जाऊन पाहणी केली असता विहिरीत नवीन बसवलेली निळ्या रंगाची टेक्मो कंपनीची ५ अश्‍वशक्तीची पानबुडी मोटर, तसेच तिला जोडलेला ३५ फूट लांबीचा ४ इंची काळा पाईप चोरीस गेल्याचे दिसले. चोरीस गेलेल्या वस्तूंची अंदाजे किंमत सुमारे ३१ हजार ७५० रुपये इतकी आहे. या प्रकरणी अज्ञात चोरट्याविरोधात गुन्हा दाखल केला आहे. पुढील तपास पोलिस हवालदार मोरे करीत आहेत.