डॉ. नारायण जाधव यांना ज्ञानोबा-तुकाराम पुरस्कार

आळंदी, ता. १६ : आळंदी (ता. खेड) येथील डॉ. नारायण महाराज जाधव यांना २०२३ चा राज्य सरकारचा ‘ज्ञानोबा-तुकाराम पुरस्कार’ जाहीर झाला आहे. या पुरस्काराची सोमवारी (ता. १५) घोषणा केली. सांस्कृतिक कार्यमंत्री सुधीर मुनगंटीवार यांनी जाधव यांचे अभिनंदन केले आहे.
डॉ. जाधव मुळचे नगर जिल्ह्यातील पारनेर तालुक्यातील कर्जुले हरिया येथील रहिवाशी आहेत. घरात वारकरी संप्रदायाचा वारसा असल्याने त्यांची पावले आळंदीकडे अध्ययनासाठी वळाली. येथे आल्यानंतर सद्‍गुरू जोग महाराज वारकरी शिक्षण संस्थेत संत साहित्याचा अभ्यास सुरू केला. आळंदीतील गोपाळपुरा येथे केवल्य आश्रमामधील आनंदस्वामी ऊर्फ दन्तेस्वामी यांच्याकडे बरेच वर्षे राहून वारकरी पद्धतीचे शिक्षण घेतले. एकनाथी भागवत, विचारसागर, ज्ञानेश्वरी, वृत्तीप्रभाकर, पंचदशी अशा अनेक ग्रंथांवर त्यांचे प्रभुत्व आहे. त्यांनी वारकरी शिक्षण देणारी संस्था आळंदीत उभी करून शेकडो कीर्तनकार, प्रवचनकार, साधकांना घडविण्याचे काम केले आहे.
दरम्यान, जाधव यांनी भारतीय तत्त्वज्ञान आणि संस्कृत विषय घेऊन पुणे विद्यापिठातून एम. ए. पदवी मिळविली. ‘बीएएमएस’ शिक्षण घेतले. ते व्यवसायाने आयुर्वेद डॉक्टर होते. नगर जिल्ह्यातील टाकळी ढोकेश्वर येथे वैद्यकीय निःशुल्क सेवा केली आहे.