आईवडिलांशी वादातून मोटारसायकली जाळल्या

आळंदी, ता. १ : आईवडिलांशी झालेल्या किरकोळ वादातून मुलाने घरासमोरील दोन मोटारसायकल पेट्रोल टाकून जाळल्या, तर आईवडिलांना शिवीगाळ करत मारण्याची धमकी दिली. याप्रकरणी आळंदी पोलिस ठाण्यात मुलाविरोधात गुन्हा दाखल केला आहे. गणेश पंढरीनाथ कुऱ्हाडे असे गुन्हा दाखल केल्या युवकाचे नाव असल्याची माहिती आळंदी पोलिसांनी दिली.
आळंदी पोलिसांनी दिलेल्या माहितीनुसार, ही घटना शुक्रवारी (ता. ३१) आळंदी- चऱ्होली रस्त्यावर घडली. या प्रकरणी फिर्याद आरोपी मुलाच्या आईने आळंदी पोलिस ठाण्यात दिली. आरोपीने घरामध्ये मोठ्याने आरडाओरडा करत घरातील वस्तूंची तोडफोड लाकडी बॅटने केली. सोबत घरासमोरील दोन मोटारसायकलही जाळल्या. आईवडिलांना हाताने मारहाण करत गलिच्छ भाषेत शिवीगाळ केली. याप्रकरणी आळंदी पोलिस अधिक तपास करत आहेत.