आळंदीमध्ये इंद्रायणीत कपडे धुण्यासाठी गर्दी

आळंदी, ता. २ : महात्मा गांधी जयंतीनिमित्त ठिकठिकाणी स्वच्छता अभियान सुरु आहे. आळंदीत मात्र इंद्रायणी नदीत गोधड्या, कपडे धुवून अस्वच्छता, प्रदूषणात भर घातली जात असल्याचे चित्र आहे. इंद्रायणी नदीकाठी दगडी घाट आणि नदीपात्राचा वापर कपडे धुण्यासाठी केला जात आहे.
घटस्थापनेमुळे घरोघरी स्वच्छता सुरु आहे. अनेकजण घरातील कपड्यांची धुलाई करत आहेत. आळंदीत इंद्रायणीच्या दोन्ही तीरावर कपडे वाळत घालण्यासाठी विस्तीर्ण दगडी घाट आहे. तसेच नदीपात्रात पाणीही मुबलक आहे. यामुळे भोसरी दिघी, चऱ्होली, आळंदी भागातील नागरिक गेल्या चार दिवसांपासून कपडे धुण्यासाठी गर्दी करत आहेत. कपडे सुकविण्यासाठी नदीवरील पुलाचे कठडे, स्कायवॉक, दगडी घाटाचा वापर करत आहेत. आज दुपारपर्यंत कडक ऊन होते. परिणामी अन्य कपडे धुऊन होईपर्यंत आधीचे धुतलेले कपडे सुकून जात होते. यामुळे व्यावसायिक, लाँड्रीवालेही कपडे धुण्यासाठी इंद्रायणी घाटाला पसंती देत होते.
नदीपात्रात आधीच प्रदूषण आहे. मात्र आता प्रत्येकजण आपापल्या परीने अस्वच्छता करून नदी प्रदूषणात भर घालत असल्याचे चित्र आहे.