आळंदीत प्रस्थान सोहळ्याच्या आयोजनाची बैठक

आळंदी, ता. १५ : ज्ञानेश्‍वर महाराजांच्या पालखीला खांदा देण्यासाठी देऊळवाड्यात येणाऱ्या ग्रामस्थांनी पांढऱ्या रंगाचे वस्त्र परिधान करावे. खांदेकऱ्यांसाठीचे पास आळंदीकर ग्रामस्थ सोडून अन्य लोकांना देऊ नयेत. पालखी प्रस्थानासाठी गुरुवारी (ता. १९) देऊळवाड्यामध्ये दोनशे चाळीस ग्रामस्थ तरुणांना मंदिरात सन्मानाने प्रवेश दिला जाईल. प्रस्थानादिवशी गालबोट लागणार नाही यासाठी दक्षता बाळगावी. असा आळंदीकर ग्रामस्थ, पोलिस प्रशासन आणि आळंदी देवस्थानच्या विश्‍वस्तांनी शनिवारी (ता. १४) झालेल्या बैठकीत एकमताने निर्णय झाला.
आळंदी देवस्थानच्या भक्तनिवासामध्ये ही बैठक पालखी सोहळा प्रमुख डॉ. भावार्थ देखणे, विश्‍वस्त चैतन्य महाराज लोंढे, पुरुषोत्तम महाराज पाटील, आळंदी पोलिस ठाण्याचे वरिष्ठ पोलिस निरिक्षक भीमा नरके, आळंदीकर ग्रामस्थ यांच्या वतीने बैठक पार पडली. यावेळी हा निर्णय एकमताने घेण्यात आला. याप्रसंगी ज्ञानेश्‍वर वीर, संजय घुंडरे, डी. डी. भोसले, राहुल चिताळकर, प्रशांत कुऱ्हाडे, नंदकुमार कुऱ्हाडे, विष्णू वाघमारे, संकेत वाघमारे, आदित्य घुंडरे, मृदुल भोसले, विलास घुंडरे, सागर रानवडे, रोहिदास तापकीर, सुदीप गरुड आदी उपस्थित होते. पालखी प्रस्थाना दिवशी वीणा मंडपामध्ये पालखी खांद्यावर घेण्याचा मान आळंदीकर ग्रामस्थांचा आहे. दरवेळी देऊळवाड्याच्या आतील परिसर आणि त्यामुळे होणाऱ्या गर्दीमुळे अनुचित घटना घडू नये यासाठी देवस्थान, पोलिस, ग्रामस्थ यांच्यामध्ये सुसंवादाने निर्णय घेतला जातो. पालखी प्रस्थान सोहळ्यासाठी मानाच्या दिंडीतील नव्वद वारकऱ्यांना प्रवेश देण्याचे मागील वर्षी ठरले. ग्रामस्थ तरुणांपैकी दोनशे चाळीस जणांना पास उपलब्ध करून प्रवेश दिला जाईल. मात्र मंदिरात येताना प्रत्येकाने ड्रेसकोड पाळणे आवश्यक आहे. वीणा मंडपात पालखी नाचवू नये तसेच वादविवाद टाळण्याचे आवाहनही करण्यात आले.