आळंदीत वारकऱ्यांना रेनकोट वाटप

आळंदी, ता. १६ : संत ज्ञानेश्‍वर महाराज पालखी सोहळ्यासाठी आळंदीत भाजपच्या कार्यकर्त्यांकडून वारकऱ्यांना मोफत रेनकोट वाटप केले जात आहेत. आजपर्यंत सुमारे ७५ हजार रेनकोटचे वाटप झाले. माऊलींच्या सोहळ्यातील दिंड्यांसाठी तीन लाख रेनकोट वाटपासाठी आले असून दिंडीप्रमुखांकडे दिले जाणार आहेत. प्रस्थान सोहळ्याच्या दिवसापर्यंत (ता. १९) आळंदीत रेनकोटचे वाटप केले जाणार असून शिल्लक रेनकोटचे वाटप पालखी मार्गावर सासवड, जेजुरी पालखी मुक्कामाच्या ठिकाणी वितरित केले जाणार आहेत.
याबाबत भाजपचे पदाधिकारी किरण येळवंडे म्हणाले, ‘‘मुख्यमंत्री देवेंद्र फडणवीस यांच्या माध्यमातून रेनकोट मागील वर्षीप्रमाणेच यंदाच्या वर्षीही दिले आहेत. यंदा पाऊस मोठ्या प्रमाणात पडण्याची शक्यता आहे. वारकऱ्यांना पावसापासून संरक्षण व्हावे या उद्देशाने रेनकोटचे वाटप केले जात आहे. सोहळ्यात चालणाऱ्या दिंड्यांच्या प्रमुखांकडे आणि वीणा प्रमुखांकडे रेनकोट दिले जात आहेत. दिंडीतील वारकऱ्यांची जेवढी संख्या असेल तेवढे रेनकोट दिले जात आहेत. यासाठी दिंडी चालकांनी विहित नमुन्यामध्ये दोन अर्जांवर दिंडीचे पत्रक, दिंडीप्रमुखांची सहीकरून भाजपच्या आळंदीतील कार्यकर्त्यांकडे जमा करायचे आहे. वीणेकऱ्यांनी अर्ज आणले तरी रेनकोट दिले जाणार आहेत.

रेनकोटसाठी भरावा लागणार फॉर्म
रेनकोटसाठी दिंडीप्रमुखांना दिंडीचे नाव, दिंडी क्रमांक, मालकाचे नाव, त्यांचा संपर्क क्रमांक, पत्ता, रेनकोट घेणाऱ्याचे स्वतंत्र नाव, संख्या फॉर्ममध्ये लिहावी लागणार आहे. याचबरोबर दिंडीप्रमुखांचे स्वाक्षरी असलेले पत्र आणि दिंडीत चालणाऱ्या भाविकांचे नाव, संपर्क क्रमांकाची यादीही जोडावी लागणार आहे. रेनकोटसाठी वारकऱ्यांना दोन फॉर्म भरून द्यावे लागणार असल्याचे चित्र आहे.