वाहून जाणाऱ्याला वाचविण्यात एनडीआरएफचे यश

आळंदी, ता. २० : इंद्रायणी नदी पात्रामध्ये स्नान करत असताना पाण्याची पातळी वाढल्यामुळे एक वारकरी वाहून गेल्याची घटना गुरुवारी (ता. १९) सकाळी घडली. एनडीआरएफ टीमने वाहून गेलेल्या वारकऱ्याला वाचविले आहे.
अमोल तुकाराम राठोड (वय ३८, गाव-शेंदुरसनी जि. यवतमाळ) वाचविलेल्याचे नाव आहे. याबाबत माहिती देताना मुख्याधिकारी माधव खांडेकर म्हणाले राठोड नावाची व्यक्ती वाहून गेल्याने इंद्रायणी नदी पात्रातील झाडाला अडकल्याचे निदर्शनास आले, घटनास्थळी एनडीआरएफ टीमचे रेस्क्यूअर सुरेश हळदमळ, सुनील पाटील, शशांक कदम, अलंकापुरी जीव रक्षक संघटनेचे आनंद वडगांवकर, अर्जुन खिलारे, भीमा खिलारे, सूरज लोकरे यांनी धाव घेत त्या व्यक्तीला बाहेर काढण्यासाठी प्रयत्न केला. ही व्यक्ती काटेरी झाडाला अडकल्यामुळे तसेच पाण्याचा प्रवाह जास्त असल्यामुळे व्यक्तीला बाहेर काढताना अडचण येत होती. काही वेळाने त्या व्यक्तीला धीर देऊन बाहेर काढण्यात टीमला यश आले. घटनास्थळी रुग्णवाहिका बोलविल्यामुळे व्यक्तीचे प्राण वाचविण्यात यश आले. पुढील उपचारासाठी ग्रामीण रुग्णालय आळंदी येथे त्यांना दाखल करण्यात आले असून उपचार सुरु आहेत.