आळंदीतील पुंडलिक मंदिरात शिरले सांडपाणी

आळंदी, ता. १० ः आळंदी (ता. खेड) येथील इंद्रायणीकाठी दगडी घाट फोडून राज्य तिर्थक्षेत्र विकास आराखड्यातून सांडपाणी वाहून नेणाऱ्या वाहिनीचे काम सुरू आहे. दरम्यान, या ठिकाणी सांडपाणी वाहिनी तुंबल्याने सर्व सांडपाणी सध्या भक्त पुंडलिक मंदिरात शिरले आहे. मंदिराभोवती सांडपाणीयुक्त चिखल साठल्याने दर्शनासाठी येणाऱ्या भाविकांची कुचंबणा झाल्याचे चित्र आहे.
गेल्या दोन महिन्यांपासून राज्य तिर्थक्षेत्र विकास आराखड्यामार्फत आळंदी शहराच्या एसटीपीसाठीच्या सांडपाणी वाहून नेणाऱ्या वाहिनीचे बांधकाम सुरू आहे. महाराष्ट्र जीवन प्राधिकरणच्या आधिपत्याखाली कामकाज सुरू आहे. दरम्यान, कामासाठी ठिकठिकाणी घाटावर खोदाई केल्याने सांडपाणी वाहून नेणाऱ्या वाहिनीवरील चेंबर तुंबले. परिणामी इंद्रायणी काठच्या भक्त पुंडलिक मंदिरात सांडपाणी वाहू लागले. त्यामुळे मंदिराभोवती चिखल पसरला आहे. नगरप्रदक्षिणा करणाऱ्या वारकरी विद्यार्थ्यांना यामुळे मंदिरात जाणे अशक्य झाले आहे.
दरम्यान, याबाबत आळंदीकरांसह वारकऱ्‍यांनीही नाराजी व्यक्त केली. याबाबत आळंदी नगरपरिषद मुख्याधिकारी माधव खांडेकर यांनी सांगितले की, ‘‘सांडपाणी पुनर्वापर योजनेचे काम सध्या सुरू आहे. महाराष्ट्र जीवन प्राधिकरणच्या अधिकाऱ्यांना झाल्या घटनेची माहिती देण्यात आली आहे. याबाबत अधिकारी इंद्रायणीकाठी कामाची पाहणी करत आहेत. त्यांनी दुरुस्तीबाबत संबंधित ठेकेदाराला आदेश दिले आहेत. त्यांना झालेली घटना मान्य आहे. मात्र, नदीच्या पाण्याच्या पातळीत वाढ झाल्याने चेंबरमधून पाणी उफाळून आले आहे. पाण्याची पातळी खाली गेली की चेंबरमधून पाणी उफाळणार नाही.’’