चऱ्होली बाह्यवळण मार्ग वाहतुकीसाठी त्रासदायक

आळंदी, ता. १५ : राज्य तिर्थक्षेत्र विकास आराखड्यातून औद्योगिक वाहतुकीसाठी तयार करण्यात आलेल्या चऱ्होली बु. ते चऱ्होली खुर्द बाह्यवळण मार्गावरील सुमारे दोन किलोमीटरच्या रस्त्यावर खड्ड्यांमुळे वाहनचालक मेटाकुटीला आले आहेत. धानोरे, मरकळ, भोसरी औद्योगिक भागांत ये-जा करणारे तसेच शालेय विद्यार्थी वाहतूक करणाऱ्या वाहनांना अर्धा ते पाऊण तासांचा अधिक प्रवास करावा लागत आहे.
पिंपरी-चिंचवड महापालिका हद्दीतील चऱ्होली बु. ते खेड तालुक्यातील आळंदी शहरालगत असलेल्या चऱ्होली खुर्द ग्रामपंचायत हद्दीतून हा बाह्यवळण मार्ग जातो. या मार्गाचे रुंदीकरण आणि त्यानंतर डांबरीकरण करण्यात आले होते. मात्र, रस्ता सुरवातीपासूनच निकृष्ट दर्जाचा आहे. तो बनवून हस्तांतरित होण्यापूर्वीच त्यावर वर्दळ सुरू होती. परिणामी, रस्त्यावर खड्डे पडले आहेत. वारंवार मुरूम टाकून ते बुजविले जातात. आळंदी शहरात वाहतूक कोंडीमुळे प्रवासाचा वेळ वाढतो. तर, बाह्यवळण मार्गावरील खड्ड्यांमुळे वेळ तर वाया जातोच त्याचसोबत वाहनाचे नुकसान आणि आरोग्याचाही प्रश्न उद्भवतो. अशा द्विधा मनःस्थितीत वाहनचालक अडकले आहेत.

मी नियमित भोसरी औद्योगिक भागात जाण्यासाठी आळंदी शहराऐवजी बाह्यवळण रस्त्याचा वापर करतो. मात्र, गेली दोन ते तीन वर्षांपासून खराब रस्ता, वाहतूक कोंडी यामुळे जीवमुठीत घेऊन दुचाकी चालवावी लागत आहे.
- संदीप क्षिरसागर, वाहनचालक

खड्ड्यांमुळे दोन किलोमीटरचे अंतर पार करण्यासाठी अर्धा ते एक तासांचा वेळ लागतो. या मार्गाचा कामगारांकडून मोठ्या प्रमाणात वापर केला जातो. वाहतूक कोंडी व खड्ड्यांमुळे दररोज पोहोचण्यास उशीर होतो. परदेशातून कारखान्याला भेट देणाऱ्या व्यावसायिकांना खड्डे कसे न्यायचे असा प्रश्न पडतो. यामुळे निर्यातीवर विशेष परिणाम जाणवत आहे. भविष्यातील अपघात टाळण्यासाठी आणि लोकांचा वेळे वाचविण्यासाठी रस्त्यातील खड्डे दुरुस्त करण्याची गरज आहे. याबाबत सार्वजनिक बांधकाम कार्यकारी अभियंता यांनाही पत्रव्यवहार केला आहे.
- महेंद्र फणसे, अध्यक्ष, इंद्रायणी इंडस्ट्रिअल असोसिएशन