तिसऱ्या मजल्यावरून दोन मजूर कोसळले आळंदीतील घटना ः एकाचा मृत्यू, एकजण जखमी

आळंदी, ता. १६ ः इमारतीच्या तिसऱ्या मजल्यावरून दोन मजूर खाली पडल्याने एकाचा मृत्यू तर एकजण जखमी झाला आहे. चंद्रकांत यशवंत सुतार (वय ५३, रा. वडगाव रस्ता, आळंदी) हे मृत्युमुखी पडले तर निरदार भिमान्ना मेलकरी (वय ४३, रा. चऱ्होली) हे जखमी झाले. त्यांच्यावर डुडूळगावमध्ये खासगी रूग्णालयात उपचार सुरू आहेत. ही घटना आळंदीतील चऱ्होली रस्त्यावर घडली.
एका खासगी इमारतीचे एक गुंठा जागेमध्ये तीन मजली बांधकाम सुरू होते. इमारतीच्या बांधकामासाठी झारखंड येथील बांधकाम व्यावसायिक अब्दुल गफार यांना करार करून काम दिले होते. दरम्यान इमारतीच्या तिसऱ्या मजल्यावर बांबूचा पहाड होता. यावर हे दोन्ही मजूर चढले होते. त्यानंतर सुतार आणि मेलकरी दोघेही जमिनीवर पडले. डोक्याला मार लागल्याने सुतार यांचा मृत्यू झाला. मेलकरी यांच्यावर डुडुळगावमधे खासगी रूग्णालयात उपचार सुरू आहेत.