ज्ञानेश्वर विद्यालयात गुणवंतांचा सत्कार

आळंदी, ता. १९ : आळंदी येथील ज्ञानेश्वर विद्यालयामध्ये दहावीमध्ये प्रथम आलेल्या भक्ती राऊत हिला प्रमाणपत्र, मनगटी घड्याळ आणि साडेसतरा हजाराची रोख रक्कम देऊन गौरविण्यात आले. याचप्रमाणे विद्यालयातील पाचवी, आठवी, दहावी आणि बारावीमधील प्रथम तीन विद्यार्थ्यांचाही सन्मान केला.
याप्रसंगी शेखर महाराज जांभूळकर, भाऊ कड, प्रदीप वळसे पाटील, अजित वडगावकर, दीपक पाटील, अनिल वडगावकर, दिलीप लोखंडे, राहुल बांगर, बाबूलाल घुंडरे, सूर्यकांत मुंगसे, किसन राठोड, प्रशांत सोनवणे, अनिता पडवळकर, अनुजायीनी राजहंस, प्रदीप काळे आदी उपस्थित होते. सन्मान सोहळ्याला उत्तर देताना मनोगतातून भक्ती राऊत हिने, शिक्षकांनी दिलेले ज्ञान व संस्कार याच्या बळावर जीवनाचे ध्येय प्राप्त करू आणि देशाची सेवा करून परिवाराचे व शाळेचे नाव मोठे करू, असे आश्वासन देत शिक्षकाविषयीचा कृतज्ञता भाव व्यक्त केला.
प्रदीप वळसे पाटील म्हणाले, ‘‘आळंदीतील ज्ञानेश्वर शिक्षण संस्था ही विद्यार्थ्यांना फक्त ज्ञान देणारी शिक्षण संस्था नसून विद्यार्थ्यांमध्ये ‘ओळख श्री ज्ञानेश्वरीची’ सारख्या उपक्रमातून संस्कार आणि मूल्यांची जडणघडण करणारे विद्यालय आहे.
ज्ञानेश्वर विद्यालय हे संस्कार व संस्कृतीचे दर्शन घडविणारे विद्यालय आहे.’’ योगेश मठपती यांनी सूत्रसंचालन केले. प्रदीप काळे यांनी आभार मानले. माऊलींच्या पसायदानाने कार्यक्रमाची सांगता झाली.