पालखी सोहळ्यासाठी वाहतुकीत आज बदल

आळंदी, ता.१९ : संत ज्ञानेश्वर महाराज आणि संत तुकाराम महाराजांचे पालखी सोहळे रविवारी (ता.२०) पुण्याहून आळंदीत दाखल होत आहेत. यामुळे रविवारी (ता.२०) दुपारी दोन ते रात्री आठ वाजेपर्यंत पुणे भोसरीमार्गे आळंदीत येणारी आणि मरकळ चाकण मोशीमार्गे आळंदीला येणारी वाहतूक बंद ठेवली जाणार आहे.
आळंदीतून देहूकडे मोशीमार्गे संत तुकाराम महाराजांचा पालखी सोहळा सोमवारी (ता.२१) जाणार असल्याने मोशीहून आळंदीमार्गे येणारी वाहतूक सकाळी सात ते दुपारी दोनपर्यंत पूर्णपणे बंद ठेवली जाणार आहे. तसेच भोसरीसह मोशी चाकण मरकळ बाजूने आळंदीत येणाऱ्या अवजड प्रकारच्या वाहनांना बंदी करण्यात आली आहे.
पिंपरी-चिंचवड शहर वाहतूक विभागाच्या पोलिसांनी याबाबत वाहतूक व्यवस्थेमध्ये दोन्ही संतांच्या पालख्यांच्या आळंदीतील आगमनामुळे बदल केला आहे. यामध्ये रविवारी (ता.२०) पुण्याहून आळंदीला येणारी वाहने वडमुखवाडी चौकातून तसेच चऱ्होली फाटा चौकातून वळविण्यात येतील. तर मोशी चाकण मरकळमार्गे आळंदीला येणारी वाहतूक बंद ठेवली जाईल. सोमवारी (ता.२१) आळंदीतील चाकण चौक वडगाव चौक पालिका चौक मरकळ चौकात सर्व प्रकारच्या वाहनांना मनाई आहे.
दरम्यान, रविवारी (ता.२०) दोन्ही संतांचे पालखी सोहळे आळंदीत पोहोचल्यावर रात्री आठनंतर वाहतूक पुन्हा पुर्ववत सुरू राहील तर सोमवारी (ता.२१) संत तुकाराम महाराजांचा पालखी सोहळा डुडुळगाव मोशी मार्गे देहूला जाणार असल्याने सकाळी सात ते दुपारी दोनपर्यंत या भागात वाहतूक बंद ठेवली जाईल.