रिक्षा चालकावर आळंदीत कारवाई

आळंदी, ता. १९ ः आळंदी (ता. खेड) येथील पीएमपीएल बस थांब्यावरील इंद्रायणी पुलावर वाहतुकीस अडथळा ठरणाऱ्या रिक्षा चालकांवर कारवाईसाठी गेलेल्या वाहतूक पोलिसांची आणि रिक्षाचालकाची बाचाबाची झाली. त्यानंतर रिक्षा चालक दगड उचलून पोलिसांच्या अंगावर धावून गेला. अखेर वाहतूक पोलिसांनी रिक्षा ताब्यात घेऊन त्याच्यावर दंडात्मक कारवाई केली. शुक्रवारी (ता. १८) सायंकाळी वाहतूक पोलिस आणि रिक्षा चालकामध्ये पालिका चौकात बसथांब्याजवळ हमरीतुमरी झाली. यावेळी वाहतूक विभागाचे वरिष्ठ पोलिस निरिक्षक सतीश नांदूरकर आणि त्यांचा कर्मचारी वर्ग उपस्थित होता. यावेळी पोलिस आणि रिक्षा चालकामध्ये वाहतुकीस अडथळा ठरेल अशी रिक्षा उभी केल्यावरून वाद झाला. दरम्यान, स्वतः वरिष्ठ पोलिस निरिक्षक नांदूरकर यांनी रिक्षा चालकास समजावले आणि रिक्षावर दंड असल्याचे सांगून रिक्षा ताब्यात घेतली.
यावेळी नांदूरकर म्हणाले, ही रिक्षा पुलावर वाहतुकीस अडथळा होईल अशी उभी होती. याचबरोबर पीएमपीएल बस जाण्यासही अडथळा होत असल्याने रिक्षा मागे घेण्यास सांगितले. तरीही तो निवांत बसून उद्धट बोलत होता. त्यानंतर रिक्षाचालक खाली उतरला. पळत जाऊन दगड उचलून मारण्याची धमकी देत होता. त्याची रिक्षा कारवाईसाठी जमा केली. रिक्षा चालक त्यानंतर पळून गेला. दरम्यान, त्याला पोलिसांकडून मारहाण वगैरे झालेली नव्हती. याठिकाणी पुलावर अनेक रिक्षा उभ्या असल्याने वाहतुकीस सतत अडचण होती. रविवारी (ता. २०) येणाऱ्या पालखी नियोजनासाठी बैठकीस जावे लागणार असल्याने पुढील कारवाई केली नाही. मात्र, संबंधित रिक्षा चालकावर गुन्हा दाखल केला जाणार आहे. त्या रिक्षावर २१ हजार रुपये दंड आहे.