आळंदीत उघड्यावर कचरा टाकणे पडणार महागात

आळंदी, ता.२६ : आळंदी नगर परिषदेकडून शहरात अस्वच्छता पसरविणाऱ्यांवर कठोर करण्यात येत आहे. उघड्यावर कचरा टाकणाऱ्यांवर दंडात्मक कारवाई होणार आहे. यासाठी रात्रीही नजर ठेवण्यासाठी कर्मचारी नियुक्त केले आहेत. दरम्यान, उघड्यावर कचरा फेकणाऱ्या नागरिकाकडून पाचशे रुपयांचा दंड वसूल करण्यात आला आहे. काही नागरिक आणि व्यावसायिकांकडून रात्रीच्यावेळी रस्त्यावर कचरा फेकून देण्याचे प्रकार समोर आले होते. यामुळे अशा बेशिस्त नागरिकांवर थेट कारवाई करण्यात येणार आहे. दंडात्मक कारवाई करण्यात येणाऱ्या नागरिकांना अधिकृत पावती देण्यात येणार आहे. तसेच कचरा टाकणाऱ्यांचे फोटो व व्हिडिओ घेण्यात येणार असल्याची माहिती मुख्याधिकारी माधव खांडेकर यांनी दिली.