आळंदी रिक्षाचालकाकडून प्रवासी महिलेचा विनयभंग

आळंदी, ता. २८ : रिक्षामधून प्रवास करत असताना रिक्षाचालकाने महिलेचा विनयभंग केला. दोघांमध्ये झटापटी झाली आणि यामध्ये महिलेचा पाच तोळे गंठण गहाळ झाले. याबाबत आळंदी पोलिस ठाण्यामध्ये रिक्षाचालकाच्या विरोधात गुन्हा दाखल केला आहे. ही घटना मंगळवारी (ता. २२) आळंदी- चाकण रस्त्यावर वारकरी शिक्षण संस्थेच्या समोर घडली.
याबाबत फिर्याद खेड तालुक्यातील खालुंब्रे येथील एका बावीस वर्षे महिलेने आळंदी पोलिस ठाण्यात रविवारी (ता. २७) दिली. आळंदी पोलिसांनी दिलेल्या माहितीनुसार, फिर्यादी महिला अनोळखी रिक्षामध्ये आळंदीमध्ये प्रवास करत होती. चाकण रस्त्याकडे जाणाऱ्या वारकरी शिक्षण संस्थेच्या समोर रिक्षावाल्याचे नियत फिरली आणि त्याने प्रवासी महिलेचा विनयभंग करण्याचा प्रयत्न केला. यावेळी रिक्षाचालक आणि प्रवासी महिला दोघांमध्ये झटापट झाली. दोघांच्या झटापटीत प्रवासी महिलेचे पाच तोळे सोने अंदाजे पाच लाख रुपये किमतीचे गहाळ झाले. याबाबत संबंधित प्रवासी महिलेने आळंदी पोलिस ठाण्यामध्ये अज्ञात रिक्षाचालकाविरोधात फिर्याद दाखल केली आहे. त्याचा शोध आळंदी शहर पोलिस घेत आहेत.