आळंदीत ट्रेलरच्या धडकेत युवकाचा मृत्यू

आळंदी, ता. २८ : भरधाव ट्रेलरच्या धडकेत दुचाकीवरील युवकाचा मृत्यू झाला असून त्याचा भाऊ जखमी झाला आहे. शिवम नीलेश काबरा (वय १९, रा. मरकळ खेड ) असे मृत युवकाचे नाव आहे. त्याचा भाऊ आराध्य नीलेश काबरा हा जखमी असून त्याच्यावर आळंदीत खासगी रुग्णालयात उपचार सुरू आहेत. ट्रेलरचालक युवराज बाबासाहेब नाकाडे (वय २५, रा. गहिनीनाथनगर महाकाळा, ता. अंबड , जि. जालना) याच्यावर आळंदी पोलिस ठाण्यात गुन्हा दाखल झाला आहे.
याबाबत महेश जयनारायण काबरा यांनी फिर्याद दिली आहे. शिवम आणि आराध्य दोघेही दुचाकीवरून (एमएच १२, कयूयू ५५०६) मरकळ येथून तुळापूरच्या दिशेने निघाले होते. या वेळी आळंदीकडून मरकळेच्या दिशेने निघालेल्या ट्रेलरची (एमएच १४, झेडबी ७६७७) त्यांच्या दुचाकी धडक बसली. यात शिवम यांच्या डोक्याला आणि छातीला मार लागल्याने तो बेशुद्ध पडला. त्याचा पिंपरी येथील रुग्णालयात उपचाराचा पूर्वीच मृत्यू झाला. दरम्यान, अपघातानंतर ट्रेलरचालक घटनास्थळावरून पसार झाला आहे. त्याचा आळंदी पोलिसांकडून शोध सुरू आहे.

गतिरोधक बसवण्याची मागणी
मरकळ गावाच्या प्रवेशद्वारावर असलेल्या पाण्याच्या टाकीजवळील रस्त्यावर गतिरोधक बसवण्याची मागणी ग्रामस्थांकडून होत आहे. मरकळ पाटील वस्ती तसेच गोळेगाव येथील विद्यार्थी बहुसंख्येने या मार्गावरून सायकलने जातात. रस्त्यावर अवजड वाहनांची वाहतूक होत असल्याने विद्यार्थ्यांना जीव मुठीत घेऊन प्रवास करावा लागत आहे. या मुळे रस्त्याच्या दोन्ही बाजूला गतिरोधक बसवण्याची मागणी होत आहे.