वनात कचरा टाकल्याप्रकरणी आळंदीत एकावर कारवाई

आळंदी, ता. ३ : केळगाव (ता. खेड) येथील वनविभागाच्या जागेत चाकण घाटात आयुब पापामिया हवलदार (वय ५४, रा. शुक्रवार पेठ, जुन्नर, ता. जुन्नर) याच्यावर टाटा कंपनीच्या ट्रकमधून (एमएच ११ एएल ७३२७) कचरा टाकल्याप्रकरणी कारवाई केली. यावेळी वनपरिक्षेत्र अधिकारी संतोष कंक यांनी सांगितले की, आरोपी आयुब पापामिया हवलदार याच्या मालकीच्या ट्रकने धानोरे येथून प्लास्टर ऑफ पॅरिस खराब असलेले साहित्य आळंदी- चाकण रस्ता येथील राखीव वनक्षेत्रात टाकल्यामुळे राखीव वनातील पाणी दूषित होऊन वन्यप्राणी, पक्षी यांच्या जीवितास धोका होऊ शकतो. त्यामुळे हवालदार याच्यावर कारवाई केली आहे. ही कारवाई जुन्नर वनविभागाचे उपवनसंरक्षक प्रशांत खाडे यांच्या मार्गदर्शनाखाली सहाय्यक वनसंरक्षक अमृत शिंदे, वनपरिक्षेत्र अधिकारी संतोष कंक, वनपाल आनंदकुमार इंदलकर, वनरक्षक अचल गवळी, नवनाथ पगडे यांनी केली.