आळंदीत नगरपरिषदेकडून बेकायदा फलकांवर कारवाई

आळंदी, ता. ५ : आळंदी शहरात वाढत्या अनधिकृत जाहिरात फलक व फ्लेक्समुळे निर्माण होणाऱ्या वाहतूक अडथळ्याच्या, तसेच शहर विद्रूपीकरणाच्या पार्श्वभूमीवर नगरपरिषद प्रशासनाने विशेष स्वच्छता व अतिक्रमण विरोधी मोहीम राबवत १९५ अनधिकृत जाहिरात फलक हटविले.
याबाबत आळंदी नगरपरिषदेचे मुख्याधिकारी माधव खांडेकर यांनी सांगितले की, आषाढी वारीपासून शहरामध्ये विविध ठिकाणी अनधिकृत फ्लेक्स संख्या वाढली होती. शहर विद्रुपीकरण टाळण्यासाठी नगरपालिकेकडून फ्लेक्स साठवण्याची कार्यवाही केली. यामध्ये विशेष करून पीएमटी बस थांबा ते पुणे रस्त्यादरम्यान एकूण ९० अनधिकृत फलक बॅनर्स हटविण्यात आले. देहू फाटा ते साखरे महाराज पेट्रोल पंपादरम्यान एकूण १०५ अनधिकृत फलक- बॅनर्स हटविण्यात आले. त्याचप्रमाणे शहरातील मुख्य रस्ते, पदपथ, वीज खांब, सार्वजनिक भिंती, तसेच वाहतूक मार्गात अडथळा ठरणारे सर्व प्रकारचे फलक हटविण्यात आले आहेत. शहराच्या मध्यवर्ती दुभाजकावरील विजेच्या खांबावर मोठ्या प्रमाणात विविध प्रकारचे जाहिराती करणारे फ्लेक्स अनधिकृतपणे उभे राहिले होते, हे सर्व हटवण्यात आले. मागील दोन दिवसांत कारवाई करून नगर परिषदेने अनाधिकृतपणे फ्लेक्स उभारणारे आणि जाहिराती करणाऱ्यांवर कारवाई केली.
नगरपरिषदेने यासंदर्भात अनेक वेळा सूचना व आवाहन करूनही विनापरवानगी फलक व स्टँड बोर्ड लावणाऱ्या संबंधितांवर कारवाईचा इशारा दिला होता. यानंतर विशेष भरारी पथकाद्वारे प्रत्यक्ष कारवाई करत शहरातील दृष्यार्थ व वाहतूक कोंडीला कारणीभूत ठरणारे १९५ फलक हटविले आहेत.
याबाबत मुख्याधिकारी माधव खांडेकर यांनी स्पष्ट केले की, शहरातील शिस्त व स्वच्छतेसाठी कोणत्याही प्रकारच्या अनधिकृत जाहिरातींना स्थान दिले जाणार नाही. नागरिकांनी व व्यावसायिकांनी विनापरवानगी फलक लावू नयेत, अन्यथा दंडात्मक कारवाई केली जाईल. पुढील टप्प्यात वडगाव रस्ता, प्रदक्षिणा मार्ग परिसरात विशेष मोहीम हाती घेतली जाणार आहे.