गाथा पूजनाने आळंदीत हरिनाम सप्ताहाला प्रारंभ

आळंदी, ता. १० : संत ज्ञानेश्‍वर महाराजांचा ७५० वा जन्मोत्सव आणि कृष्णाष्टमीनिमित्त आळंदी देवस्थानच्या वतीने माउलींच्या समाधी मंदिरात आज गाथा पूजन आणि गाथा भजन करून हरिनाम सप्ताहाला प्रारंभ झाला. या निमित्ताने भाविकांना नामवंत कीर्तनकार प्रवचनकारांना ऐकण्याची संधी मिळणार आहे. दरम्यान शुक्रवारी (ता. १५) माउलींचा जन्मोत्सव सोहळा साजरा केला जाणार आहे. या दिवशी माउलींच्या मंदिरातील समाधी गाभारा शिखरावर अकरा किलो सोन्यातून तयार केलेला सुवर्णजडीत कळस बसविला जाणार आहे.
माउलींचा ७५० वा जन्मोत्सव राज्यभर उत्साहात साजरा केला जात आहे. त्यानिमित्त शुक्रवारी (ता. १५) राज्यभर जन्मोत्सव साजरा करण्याचे परिपत्रक राज्य सरकारने नुकतेच काढले होते. तर विविध शाळांमधून १४ ऑगस्टला पसायदान म्हणण्याबाबतही परिपत्रक काढण्यात आले आहे. दरम्यान प्रतिवर्षीप्रमाणे आळंदी देवस्थानने कृष्ण जन्माष्टमी आणि माऊली जन्मोत्सवानिमित्ताने आजपासून हरिनाम सप्ताहाचे आयोजन केले आहे. त्याची सुरुवात आळंदी देवस्थानचे विश्‍वस्त चैतन्य महाराज कबीर यांच्या हस्ते वीणा मंडपात गाथा पूजन करून करण्यात आली. यावेळी देवस्थानचे व्यवस्थापक ज्ञानेश्‍वर वीर तुकाराम माने बाळासाहेब चोपदार उपस्थित होते. गाथा पूजनाच्या वेळी मंत्रोच्चार पुरोहित विजय कुलकर्णी यांनी केले. त्यानंतर गाथा भजनाला सुरुवात झाली. आजपासून दररोज दुपारी चार ते सायंकाळी पाच यावेळेत प्रवचन, तर सायंकाळी साडेसहा ते रात्री साडेआठ वाजता कीर्तनाचा कार्यक्रम होणार आहे. त्यानंतर रात्री दहा ते बारा गावकरी भजन होणार आहे. या जन्मोत्सवानिमित्ताने
प्रवचनामध्ये आळंदी देवस्थानचे विश्‍वस्त चैतन्य महाराज कबीर, डॉ. नारायण महाराज जाधव, गोविंद महाराज गोरे, रमेश महाराज, योगी निरंजननाथ आणि साधक आश्रमाच्या वतीने दररोज प्रवचन होणार आहे. तर दररोज सायंकाळी साडेसहा ते साडेआठ शंकर महाराज बडवे, पुरुषोत्तम महाराज पाटील, चिन्मय महाराज सातारकर, समाधान महाराज शर्मा, बाळासाहेब शेवाळे, महाराज वारकरी शिक्षण संस्था आळंदी यांच्या वतीने कीर्तनाचा कार्यक्रम होणार आहे. शुक्रवारी या दिवशी कृष्ण जन्माष्टमी आणि माउलींचा जन्मोत्सव असणारे रात्री दहा ते बारा दरम्यान माउली जन्म आणि कृष्ण जन्माचे कीर्तन केले जाणार आहे. त्यानंतर माउलींच्या समाधीवर पुष्पवृष्टी आणि आरती करून देवस्थान तसेच ग्रामस्थांच्या वतीने सुंठवडा वाटण्यात येणार आहे. शनिवारी (ता. १६) गोपाळकाला असल्याने सकाळी दहा ते बारा देवस्थानचे माजी अध्यक्ष बापूसाहेब महाराज देहूकर यांचे काल्याचे कीर्तन होणार आहे. त्यानंतर जन्मोत्सवाच्या निमित्ताने आयोजित केलेल्या हरिनाम सप्ताहाने सांगता होणार आहे.