ज्ञानेश्वर विद्यालयातील शिक्षकांचा गौरव

आळंदी, ता. ९ : खेडमधील रिद्धी सिद्धी मंगल कार्यालय येथे रविवारी (ता. ७) तालुका माध्यमिक मुख्याध्यापक शिक्षक - शिक्षकेतर संघाच्या वतीने आळंदीतील ज्ञानेश्वर विद्यालयाच्या तीन जणांना पुरस्कार देऊन गौरविण्यात आले. यामध्ये मुख्याध्यापक सूर्यकांत मुंगसे यांना जिल्हा गुणवंत मुख्याध्यापक, साहेबराव वाघुले यांना गुणवंत शिक्षक तर संगीता पाटील यांना गुणवंत सेवक पुरस्कार दिला.
विद्यालयात संस्कारक्षम ओळख श्री ज्ञानेश्वरीची, विद्यार्थी घडताना, कलाकार घडताना, एक पान प्रतिभेचे, सिंहावलोकन, नियोजन आज व उद्याचे, एक हात मदतीचा, एक हात सेवेचा, गुणवत्ता अंतर्गत दहावी, बारावी, जादा तास, तज्ज्ञ व्याख्यान, मासिक चाचण्या, विनामूल्य स्पर्धा परीक्षांचे मार्गदर्शन असे अनेकविध उपक्रम राबविले जातात. विद्यालयाअंतर्गत चालणारी कार्यप्रणाली व कार्यक्षम यंत्रणेच्या नेतृत्वाची दखल घेऊन अखिल भारतीय श्री श्वेतांबर स्थानकवासी जैन संघाच्यावतीनेही मुंगसे यांना सावित्रीबाई फुले, पुणे विद्यापीठाचे कुलगुरू डॉ. सुरेश गोसावी आणि शाकाहाराचे पुरस्कर्ते डॉ. कल्याण गंगवाल यांचे हस्ते आदर्श प्राचार्य म्हणून ‘कर्मवीर भाऊराव पाटील पुरस्कार’ देऊन नुकतेच गौरवण्यात आले. तसेच हा पुरस्कार संस्थेचे सचिव अजित वडगावकर, सुनीता मुंगसे, उद्योजक अर्जुन गायकवाड, उज्ज्वला कडलासकर यांनीही स्वीकारला.