आळंदीमध्ये ‘एकता दौड’चे उत्साहात स्वागत

आळंदी, ता. ३१ : लोहपुरुष सरदार वल्लभभाई पटेल यांच्या १५० व्या जयंतीनिमित्त पिंपरी-चिंचवड पोलिस आयुक्तालय व आळंदी पोलिस ठाणे यांच्यावतीने ‘रन फॉर युनिटी’चे आयोजन केले होते. ही ‘एकता दौड’ चाकण चौक, प्रदक्षिणामार्ग, जुना पूल, वाय जंक्शन, नवीन पूल, ज्ञानेश्वर विद्यालय या मार्गाने आयोजित केली होती. या रॅलीमध्ये सहभागी झालेल्या विद्यार्थ्यांसाठी पाणी व ज्यूसची सुविधा केलेली होती. रस्त्याच्या दुतर्फा असलेल्या नागरिकांनी या रॅलीचे स्वागत केले. यामध्ये आळंदी शहर आणि परिसरातील डॉक्टर असोसिएशन, आळंदी देवस्थान, संघर्ष प्रतिष्ठान, ज्ञानेश्वर विद्यालय, ज्ञानगंगा इंग्लिश मीडियम, ज्ञानसाई इंग्रजी माध्यमाची शाळा आणि पंचक्रोशीतील विविध विद्यालयातील विद्यार्थी सेवाभावी तरुण मंडळे, ज्येष्ठ नागरिक आदी सहभागी झाले.

याप्रसंगी आळंदी पोलिस ठाण्यातील वरिष्ठ पोलिस निरीक्षक भीमा नरके यांनी रॅलीच्या आयोजनाचे महत्त्व विशद केले. यावेळी ज्ञानेश्वर शिक्षण संस्थेचे सचिव अजित वडगावकर, प्राचार्य सूर्यकांत मुंगसे, डॉ. विकास पाटील, डॉ. सारंग जोशी, आळंदी शहर पोलिस कर्मचारी सहभागी झाले. याप्रसंगी आळंदी पोलिस ठाण्याच्या वतीने सहभागी झालेल्या सर्वांसाठी अल्पोपाहार व चहापानाचे आयोजन केले.