वीजचोरीप्रकरणी मरकळमधील ग्राहकावर गुन्हा

आळंदी,ता. २२ : वीजमीटर बायपास करून अधिकृतपणे मागील १२ महिन्यांपासून सुमारे ६८० युनिटची चोरी करून महावितरणचे ११ हजार ४१० रुपयांचे आर्थिक नुकसान केल्याप्रकरणी मरकळ (ता. खेड) येथील ग्राहकावर आळंदी पोलिस ठाण्यात गुन्हा दाखल करण्यात आला आहे. राजाराम हरिभाऊ लोखंडे असे गुन्हा दाखल करण्यात आलेल्या ग्राहकाचे नाव आहे. तर पुणे ग्रामीण पावर हाऊस चे भरारी पथकातील जयंत धनराज गेटमे यांनी गुरुवारी (ता. २०) फिर्याद दिली आहे. पुणे ग्रामीण पावर हाऊस रास्ता पेठ येथील भरारी पथकाच्या वतीने मरकळ येथे लोखंडे यांच्या गट नंबर ७८ मध्ये वीज मीटरची पाहणी केली. यावेळी आर्थिक फायद्यासाठी अनधिकृतपणे वीजमीटर बायपास करून ६८०युनिट ची चोरी केली. तपासणीच्या वेळी अधिकचा जोडभार आढळून आला तसेच तळजळीची रक्कम अद्याप भरलेली नाही असेही फिर्यादीत नमूद केले आहे. पुढील तपास आळंदी पोलिस करत आहेत.