आळंदीत आळेफाट्यातील वारकरी बेपत्ता

आळंदी, ता. २३ : जुन्नर तालुक्यातील आळेफाटा येथून संत ज्ञानेश्‍वर महाराज रेडा समाधी मंदिर दिंडी सोबत आलेले रमेश पांडुरंग हांडे (वय ५३, रा. आळे कोळवाडी ता. जुन्नर) आळंदी येथून बेपत्ता झाले आहेत. तर दुसऱ्या घटनेमध्ये १७ वर्षीय युवतीही चऱ्होली (ता. खेड) येथून बेपत्ता झाली आहे.
हांडे हे कार्तिक यात्रेसाठी संत ज्ञानेश्‍वर महाराज रेडा समाधी येथून दिंडी सोबत आले होते. आळंदीतील एका इंग्रजी माध्यमाच्या शाळेमध्ये दिंडीचा मुक्काम होता. मंगळवारी (ता. १८) दुपारी दोनच्या दरम्यान दिंडी मधील एकाचा हांडे यांच्या मुलाला फोन आला की तुझे वडील दिंडीमध्ये दिसून येत नाहीत, घरी आले तर आम्हाला कळव. यावर हांडे यांच्या मुलाने शोध घेतला असता ते सापडले नाहीत. वडील बेपत्ता झाल्याच्या फिर्याद मुलगा मयूर हांडे यांनी आळंदी पोलिस ठाण्यामध्ये दिली.
तर अन्य दुसऱ्या घटनेमध्ये १७ वर्षीय तरुणीला अज्ञात इसमाने फूस लावून पळवून नेले. चऱ्होली खुर्द येथील स्वामी समर्थ नगरमध्ये घरासमोर अंगणामधून युवती बेपत्ता झाली. ही घटना शुक्रवारी (ता. २१) घडली. याबाबत फिर्याद तरुणीच्या आईने आळंदी पोलिस ठाण्यामध्ये दिली आहे. तरुणीने गुलाबी रंगाचा ड्रेस आणि काळे जॅकेट परिधान केले असून पायात बूट आहेत. दोन्ही बेपत्ता इसमांचा तपास आळंदी पोलिस करीत आहेत.