कचरा डेपोच्या आगीमुळे आळंदीत धुराचे लोट

आळंदी, ता. २९ : आळंदी नगरपरिषदेच्या कचरा डेपोला कार्तिकी यात्रेपूर्वी लागलेली आग आटोक्यात आली आहे. मात्र, त्यातून निघणारा धूर अद्याप थांबला नाही. धुरामुळे परिसरात मोठ्या प्रमाणात प्रदूषण होत आहे.
आळंदी देवस्थानने नगरपरिषदेला पाच एकर जागा कचरा डेपोसाठी दिली होती. मात्र, शहरातील जमा केलेला कचरा या ठिकाणी आणून टाकल्यानंतर त्याचे व्यवस्थापन, तसेच त्याची निगा राखली न गेल्याने तिथे कार्तिकी वारीपूर्वी आग लागली होती. या आगीच्या घटनेत संपूर्ण कचरा जळून खाक झाला आहे. तात्पुरती उपाययोजना केल्यानंतर नगरपरिषदेचे दुर्लक्ष झाले. आजूबाजूच्या केळगाव आणि चऱ्होली ग्रामपंचायतीच्या नागरिकांना या धुराच्या प्रदूषणाचा त्रास सहन करावा लागत आहे. याबाबत मनसेचे आळंदी शहर अध्यक्ष अजय तापकीर यांनी सांगितले की, ‘‘आळंदी नगरपरिषद प्रशासनाने तत्काळ याकडे लक्ष द्यावे. दररोज धुराचे प्रदूषणामुळे नागरिकांना होणारा त्रास बंद करावा, अन्यथा मनसे स्टाईल पाठपुरावा केला जाईल.’’

06819