आळंदीत नववर्षाची सुरुवात माउलींच्या दर्शनाने

आळंदी, ता. १ : आळंदीतील संत ज्ञानेश्‍वर माउलींच्या संजीवन समाधीचे दर्शन घेत भाविकांनी नवीन वर्षाची सुरुवात भक्ती भावाने केली. आळंदी मंदिरा सभोवतालच्या परिसरात भाविकांची गर्दी तसेच दर्शनबारीत दीड ते दोन तास थांबून माउलींच्या समाधीचे दर्शन होत होते. दिवसभरात सुमारे साठ हजार भाविकांनी माउलींच्या समाधी दर्शनाचा लाभ घेतला.
नवीन वर्षाची सुरुवात देवदर्शनाने करायची यानुसार अनेक भाविक आळंदीमध्ये पहाटेपासूनच दर्शनासाठी आले होते. त्याचबरोबर शालेय सहलीं मधील विद्यार्थ्यांची गर्दी मंदिरामध्ये प्रकर्षाने होते. पहाटेपासूनच पवमान पूजा झाल्यानंतर माउलींच्या समाधी दर्शनाचे सुरुवात झाली. माउली मंदिरातील राम मंदिरालगतचे दर्शन मंडप, आजानवृक्षा शेजारील दर्शन मंडप, महाद्वार तसेच सुवर्ण पिंपळाच्या दर्शनासाठी भाविकांची गर्दी सकाळपासूनच होती. राज्यभरातून आलेल्या भाविकांच्या गर्दीने देऊळवाडा फुलून गेला होता. साधारण दीड ते दोन तासांनी माउलींच्या समाधीचे दर्शन होत होते. मंदिरामध्ये दर्शन झाल्यानंतर माउलींचा लाडूचा प्रसाद आणि पारायण प्रत ज्ञानेश्‍वरी विकत घेऊन भाविक पूर्ण माघारी करत होते. मंदिराभोवती प्रसाद आणि खेळण्यांची दुकाने सजलेली होती.
भाविकांच्या गर्दीमुळे आळंदी येथील बहुतांश रस्त्यांवर आज वाहनांची वर्दळ मोठ्या प्रमाणात होती. याचबरोबर पेरणे फाटा येथे विजयस्तंभ मानवंदना देण्यासाठी जाणाऱ्या भाविकांची ही गर्दी आज मंदिर तसेच आळंदी मध्ये मोठी होती. पोलिसांनी वाहतुकीचे नियोजन चांगले केल्यामुळे काहीसे वाहतूक सुरळीतपणे सुरू होते. इंद्रायणी घाटावर तसेच शनी मंदिर परिसर गोपाळपुरा या भागामध्ये विशेष गर्दी होती.