शिरोली तर्फे बोरी येथे ३० वर्षांनी भरला वर्ग

आळेफाटा, ता. ८ : शिरोलीतर्फे आळे (ता. जुन्नर) येथील जिल्हा परिषद शाळेतील सन १९९५-९६ च्या इयत्ता सातवीच्या वर्गाचा स्नेहमेळावा नुकताच जिल्हा परिषद शाळा शिरोली बोरी येथे आज पार पडला. कार्यक्रमाच्या सुरुवातीला सरस्वती पूजन करण्यात आले.
तब्बल ३० वर्षांनंतर सर्व वर्गमित्र एकत्रित आल्याने वातावरण भारावून गेले होते. तत्कालीन सातवीचे वर्गमित्र व मैत्रिणी आज वेगवेगळ्या क्षेत्रात पुणे, मुंबई, नगर, नाशिक तसेच इतर ठिकाणी कार्यरत आहेत. या स्नेहमेळाव्यामुळे सोनेरी आयुष्यातील रुपेरी आठवणी जागृत झाल्या व तसेच अनेकांना गहिवरून आले. व्हॉट्सॲप ग्रुपच्या माध्यमातून सर्व तत्कालीन विद्यार्थी यांना संघटित करून या स्नेहमेळाव्याचे आपल्या गुरुजनांच्या साक्षीने आयोजन केले होते. बऱ्याच वर्षांनंतर जुने वर्गमित्र भेटल्याने गप्पांना, थट्टामस्करीला उधाण आलं होतं. शालेय जीवनामध्ये त्यांच्या वर्गाचे मार्गदर्शक शिक्षक सयाजीराव चिखले, शीला शिंगोटे, भीमाजी गायकवाड यांच्या स्मृतींना उजाळा दिला.
यावेळी उपसरपंच सुरेश सातपुते यांनी शुभेच्छा देऊन माजी विद्यार्थ्यांनी जीवनात यशस्वी होऊन शाळेप्रती दिलेली भेट याबद्दल कृतज्ञता व्यक्त करून या उपक्रमाचे कौतुक करून मैत्री सहवास व आनंदी आयुष्यासाठी असे उपक्रम दरवर्षी व्हावेत, असे मत व्यक्त केले. महेंद्र बोऱ्हाडे, रामभाऊ सातपुते, दत्तात्रेय डावखर, डॉ. किशोर मुळे, सुरेश सातपुते, विकास गुंजाळ, अजित खिलारी, दत्ता खिलारी, शरद मुळे, तुकाराम डावखर, सुमन चिखले आदी उपस्थित होते.
या बॅचच्या सर्व माजी विद्यार्थ्यांनी एकत्र येत शाळेप्रती आपली कृतज्ञता व्यक्त करत शाळेला यापूर्वीही एक संगणक संच भेट दिला होता, तसेच यावर्षीही एक संगणक संच भेट दिला आहे. कार्यक्रमाचे आयोजन सुरेंद्र डावखर, अर्चना शिंगोटे, मंगेश डावखर, संतोष खिलारी यांनी केले. सूत्रसंचालन बाळासाहेब गिलबिले यांनी केले. रोहिणी गिलबिले यांनी आभार मानले.