टेम्पो चालकाची मुलगी पोलिस दलात

आळेफाटा, ता.२५ : मुळचे वडझिरे (ता. पारनेर) येथील आणि सध्या आळेफाटा या ठिकाणी राहत असलेले बाळू वैरागार यांच्या उज्ज्वला वैरागार मुलीची पुणे पोलिस दलात निवड झाली आहे. वैरागार यांची परिस्थिती अतिशय गरीब असून आपल्याला परिस्थितीमुळे शिकता नाही आले, परंतु आपल्या मुलीने पोलिस खात्यात नोकरी करावी ही त्यांची इच्छा होती.
कुटुंबाचा उदरनिर्वाह करताना शेती अतिशय कमी असल्याने ते टेम्पो ड्रायव्हर म्हणून काम करत आहेत. उज्ज्वला हिला पहिल्यापासूनच पोलिस खात्यात भरती होण्याचे स्वप्न होते. तिचा भाऊ आकाश २०१८ मध्ये आर्मीमध्ये दाखल झाल्याने तिला अजून प्रेरणा मिळाली. तिचे शालेय शिक्षण गावातच झाले. विशेष म्हणजे आळेफाटा येथील सह्याद्री करिअर ॲकॅडमी या ठिकाणी प्रशिक्षण घेत विविध परीक्षांचा अभ्यास पूर्ण करताना पहिल्याच प्रयत्नात तिची पुणे पोलिस दलामध्ये भरती होऊन एक आदर्श समाजापुढे दाखवून दिला आहे. यासाठी तिला मयूर डुंबरे, गीताराम गायकर यांनी मार्गदर्शन केले.

माझ्या आई- वडिलांनी आमच्यासाठी अतिशय काबाडकष्ट करून शिकवले असून मुलीने पोलिस व्हावे ही त्यांची इच्छा होती. ती आज पूर्ण झाली असून यासाठी मला सह्याद्री करिअर ॲकॅडमीमधील शिक्षकांनी मार्गदर्शन केल्याने पोलिस खात्यात निवड झाली आहे. नोकरी करत असताना स्पर्धा परीक्षा देऊन पोलिस खात्यात मोठे अधिकारी व्हायचे आहे.
-उज्ज्वला वैरागार, पुणे पोलिस.

उज्ज्वला वैरागार जिद्दीच्या जोरावर मेहनत करून पोलिस दलात दाखल झाली आहे. घरची परिस्थिती अतिशय हलाखीच्या असताना देखील तिच्या आई- वडिलांनी वेळोवेळी सहकार्य केले. तिने त्यांच्या कष्टाचे चीज केले आहे.
- गीताराम गायकर, मार्गदर्शन करणारे शिक्षक.