कृषि सहाय्यकांनी पुकारलेल्या संपामुळे हंगाम विस्कळित

आळेफाटा, ता. २६ : कृषी सहाय्यक संघटनेने संप पुकारल्यामुळे खरीप हंगामाच्या तोंडावर खरीप पूर्व शेतकऱ्यांना होणाऱ्या मार्गदर्शन सभा होत नसल्याने शेतकऱ्यांना मार्गदर्शन मिळत नाही. त्यामुळे दरवर्षीप्रमाणे कृषी सहाय्यकामार्फत होणाऱ्या मार्गदर्शनाचा अभाव यावर्षी दिसून येत आहे.
राज्य कृषी सहाय्यक संघटना जुन्नरच्या वतीने (ता. १५) तारखेपासून सुरू असणाऱ्या कृषी सहायक संघटनेच्या बेमुदत काम बंद आंदोलन सुरू असून या आंदोलनामुळे शेतकरी अडचणीत आला आहे. लवकरच खरीप हंगाम सुरू होत असल्याने दरवर्षी कृषी अधिकारी शेतकऱ्यांच्या बांधावर जाऊन सोयाबीन तसेच इतर कडधान्ये यांची पेरणी कशी आणि कधी, कोणते बियाणे वापरावीत याबद्दल मार्गदर्शन करतात. त्यातच गेल्या आठ ते दहा दिवसांपासून अवकाळी पावसाने शेतकऱ्यांच्या शेतमालाचे नुकसान झालेले आहे. त्याचा पंचनामाही रखडलेला आहे.

कृषी सहायक हा शासन आणि शेतकरी यातील महत्त्वाचा दुवा आहे. आज त्यांच्यामुळे माझ्याकडे पीएमएमइ अंतर्गत कुल्फी व्यवसाय, एनएचएम अंतर्गत सीताफळ प्रकिया उद्योग, फळबाग लागवड शेततळे आणि नेहमी नैसर्गिक आपत्ती आली की कृषी सहायक हा आमच्या बांधावर आहे. माझ्याकडे फळबाग आहे आणि द्राक्ष शेतीमुळे मला नेहमी कृषी सहयक्कांची सल्ल्यासाठी गरज लागते. खरीप हंगाम जवळ आला आहे, परंतु कृषी सहायक संपावर असल्याने यंदा कोणतीही मोहीम राबविली नाही. प्रकाश सापळा, माती परीक्षण, बीजप्रक्रिया, उगवण क्षमता अशा अनेक मोहीम गावात येऊन कृषी सहायक करत असतो.
अविनाश औटी, प्रगतशील शेतकरी, राजुरी