कोळवाडीतील महिलांचा वटपौर्णिमेला संकल्प

आळेफाटा, ता. ११ ः कोळवाडी (ता. जुन्नर) येथील शिवगर्जना महिला ग्राम संघांतील महिलांनी वटपौर्णिमेचे औचित्य साधून आयोजित केलेल्या ग्राम संघाच्या वार्षिक सर्वसाधारण सभेत गावामध्ये होणाऱ्या लग्न समारंभ सत्यनारायण महापूजा या कार्यक्रमासाठी साडी किंवा कपडे असे आहेर नेण्यासाठी किंवा साडी देण्यासाठी बंदी घालण्यात आली आहे.
तसेच बाळाच्या पाचवीच्या कार्यक्रमासाठी महिलांकडून खारीक, खोबरे, तांदूळ, साखर असे पदार्थ वाढन म्हणून नेण्याची प्रथा बंद करून त्याऐवजी बाळाला व बाळाच्या आईला ऐपतीप्रमाणे आर्थिक मदत करण्याचा निर्णय वार्षिक सभेमध्ये महिलांच्या वतीने घेण्यात आला. याप्रसंगी तालुका समन्वयक उषा अभंग, शिवगर्जना महिला ग्राम संघाच्या अध्यक्षा अर्चना सहाने, सचिव वैशाली शेळके, कोषाध्यक्ष सीमा सहाने, तसेच शिवनेर भूषण सुंदर कुऱ्हाडे, सुनीता सुवर्णकार, गावातील सर्व महिला आदी उपस्थित होत्या.

यापुढे गावातील प्रत्येक महिला ही लग्न समारंभ, सत्यनारायण महापूजा आदी समारंभात साडी देणे व घेणे हे बंद केले असून, बाळ जन्माला आल्यानंतर होत असलेल्या पाचवीला जो बाजार आणला जातो तो यापुढे नेला किंवा आणला जाणार नाही, असा निर्णय कोळवाडी येथील शिवगर्जना महिला संघाच्या वतीने घेण्यात आला आहे.
- अर्चना सहाने, अध्यक्षा, शिवगर्जना महिला ग्राम संघ