बिबट्याच्या हल्ल्यात शेळी ठार

आळेफाटा, ता. १३ : राजुरी (ता. जुन्नर) येथे बिबट्याच्या हल्ल्यात शेळी ठार झाल्याची घटना शनिवारी (ता. १२) सायंकाळी साडेसहा वाजण्याच्या सुमारास घडली. याबाबत मिळालेल्या माहितीनुसार, राजुरी येथील हातवळण मळ्यात राहत असलेले शब्बीर महालदार यांचा शेळीपालनाचा व्यवसाय आहे. त्यांनी शनिवारी नेहमीप्रमाणे सायंकाळी सहा वाजण्याच्या सुमारास शेळ्या गोठ्यात बांधली. त्यानंतर अर्धा तासातच बिबट्याने गोठ्यात प्रवेश करत एका आठ महिन्यांच्या शेळीवर हल्ला केला. त्या शेळीला घेऊन जात असताना इतर शेळ्या मोठ्याने ओरडल्याने महालदार गोठ्याकडे गेले असता त्यांना बिबट्याने शेळीवर हल्ला केल्याचे दिसले. बिबट्याने त्या ठिकाणाहून पळ काढला, परंतु हल्ल्यात शेळी मृत्युमुखी पडली. घटनास्थळी वनविभागाच्या वतीने पंचनामा केला आहे.
दरम्यान, परिसरात दिवसेंदिवस बिबट्याचे पाळीव प्राण्यांवर हल्ले वाढतच चालले आहेत. बिबट्याने १५ दिवसांपूर्वी याच शेतकऱ्याच्या एका बोकडावर हल्ला करून ठार केल्याची घटना ताजी असतानाच शनिवारी पुन्हा एक शेळी ठार केली आहे. त्यामुळे या ठिकाणी वनविभागाने पिंजरा लावावा, अशी मागणी उपसरपंच माउऊ शेळके व मुसलमान जमात राजुरीचे सदर शाकीर चौगुले यांनी केली आहे.